ع السريع (3)

ع السريع (3)

1. من ساعة ما رجعت اسكندرية من السويد وانا لاحظت ان فيه 4 شركات جداد فتحوا فى اسكندرية 2 كافية وشركة سمسرة فى البورصة ومحل ملابس جديد وده بيؤكد النظرية الاقتصادية اللى بتقول ان وقت الركود هوه احسن وقت نفتح فيه بزنس جديد؛ ولا اخفى عليكم سعادتى بافتتاح فندق جديد فى اسكندرية وقرب افتتاح اخر...ايوه كده عايز نحرك الدنيا...كده فيه فرص عمل جديدة...وفيه شغل حيحصل.

2. الاخوات والاخوة المدافعين عن حقوق المرأة وسوء استغلال المرأة والعاملين فى مجال وقف التحرش الجنسى برجاء الاطلاع على اعلان الحلاوة الجديد والبيبسى كمان وسلم لى على حقوق المرأة احسن ده بقت اخر حلاوة يا ....حلاوة.
http://www.youtube.com/watch?v=1sHpmvUdlXU
http://www.youtube.com/watch?v=nGgIDrrwnr4

3. خبر فى الجرائد عن انشاء معهد لتعليم الرقص الشرقى تابع لوزارة التربية و التعليم والناس زعلانة وتقول يعنى احنا بقى عندنا تعليم كويس فى كل حاجة ولا معاهد التمريض اولى بالفلوس اللى حتتصرف واغرب تعليق سمعته مش كفاية عندهم فرقة رضا والفنون الشعبية. والمؤيدين بيقولوا انا ده فن مصرى ولازمن ولابد نحافظ عليه فى وجه الهجمات الروسية الشرسة حيث اصبحن الروسيات هن المسيطرات على ميادين الرقص فى مصر ولابد من استعادة الريادة المصرية فى هز الوسط . انا بقى عندى وجهة نظر اخرى لان التدخل الحكومى قد يؤثرعلى اتجاهات الرقص وهزالوسط كما انه سيطول وبشكل ملحوظ بدل الرقص نفسها وباقى المعدات والمستلزمات والبلطجية – عشان لو حد شطح هكا ولا هكا - وبتاع النقوط ومن موقعى هذا امام اللاب توب الاتش بى بتاعى انادى بضرورة تدخل القطاع الخاص لما له من خبرة واسعة فى اللعب على الشناكل والنهوض " بصناعة " الرقص..... وهزى يا نواعم.

4. فيه مغنية اوبرالية ايطالية " الينا ايرام "Elena Riem– سوبرانو – مش اى حاجة يعنى عاملة اغنية جامدة جدا فى التليفزيون بتغنى فيها اغانى عربى اسمها" بتطل وبتلوح" على مزيكا. انا الحقيقة شايف انها فكرة رائعة فيها مزج ما بين فنون الاوبرا والاغانى التى يفهمها الناس ببساطة مما يقرب هذا النوع من الغناء من السواد الاعظم من الناس. للمزيد عن المطربة:
http://www.myspace.com/riemelena
http://www.metacafe.com/watch/3002687/eline_riem_betol_we_betloh/
http://www.facebook.com/profile.php?id=697065096&ref=name#/group.php?gid=32320609835

5. تعريف قوى جدا "للمقال" لاستاذنا جلال عامر فى المصرى اليوم: المقال كاتب ومكتوب وبينهما ما يقرأ.

6. أستطاعت صورة ندى الايرانية ايقاظ ضمائر كثيرين مثلما فعل اغتيال الشيخ ياسين ( وقادة اخرون) ومحمد الدرة (واطفال اخرون) وشهداء مصر فى 48/67 / 73 (وما بينهما). كما انها اخبرت العالم ان هناك ما هو ابعد من القنبلة الايرانية والسجاد الايرانى والقطط الفارسى ...هناك أناس تموت.

7. مايكل جاكسون مات؛ فرح فاوست ماتت؛ انغام وهشام عباس نزلوا شرايطهم الجديدة؛ شريط عمرو دياب اتسرب؛ البرازيل غلبت امريكا على اخر وقت وبالتالى فان خريطة موسيقى البوب حتتغير وخريطة التمثيل حتتغير وخريطة الكورة بتتغير والخريطة الغنائية فى مصر حتتغير وانا ...مرارتتى حتتفقع.

8. 5 اشقاء من قنا قرروا انهم ميروحوش المدرسة غير لما ابوهم يغيراسم العيلة لان فيه مشكلة بسيطة ان جدهم اسمه "العبيط" وبالتالى العيال فى المدرسة عاملين عليهم حفلة وسموه كده عشان امه كان عليها ندر لو ربنا رزقها بولد تسميه "العبيط"...بالذمة ده كلام يعنى...ده اسامى يا ناس حرام عليكم العيال مش ناقصة حاجات تكرها فى المدارس. تخيلوا كده معايا حد من العيال ده بقى ليه منصب ولا حاجة يقولوا ايه "عبيط بيه " راح "عبيط بيه جه".