صاصا وطه وعبده ...حكايات من شارم الشيخ

صاصا وطه وعبده ...حكايات من شارم الشيخ
زيارة مدينة شارم الشيخ هى أكثر من مجرد زيارة لمدينة بمحافظة سيناء والتى تقع داخل حدود جمهورية مصر العربية فهى انتقال من قارة لقارة فكما هو معروف ان سيناء جزء من مصر ولكنها تقع فى قارة آسيا بينما باقى المحافظات تقع فى قارة أفريقيا وبذلك فالرحلة إلى هناك رحلة انتقالية من قارة لقارة أخرى تمتد عبر طريق نفق البطل الشهيد عبد المنعم رياض الذى يمر من تحت قناة السويس ويمتد الطريق بعد ذلك بين الجبال.

والمدينة معروفة بين مدن العالم بانها مدينة السلام والسياحة. والمواسم السياحية هناك مقسمة ما بين السياحة التى تسيطرعليها الجنسية الروسية والايطالية فى هذا الوقت من العام والسياحة العربية باقى ايام السنة. تستطيع ان تستمتع كيفما شئت هناك وان تسترخى وتريح أعصابك المتوترة من تسارع وتيرة الحياة وزحام المرور وتلوث الجو.

ولكن شيئا فشىء تكتشف ان شارم الشيخ ليست فقط البحروالفاتنات والسفارى والمقاهى والموسيقى العالية والديسكوهات والبارات...هى ليست نعمة باى و بودا بار وباص وباشا وبالتأكيد هى ليست فقط سوهو أسكوير ..هناك ما هو أبعد من ذلك ...الانسان.

أتقاسم معك عزيزى القارىء مجموعة من القصص والحكايات والتى لا يربطها اى رابط سوى البحث عن لقمة العيش.

أبدئها بصاصا غطاس محترف و"اسكندرانى" ولابد ان اشير هنا الى نظرة الاحترام للاسكندرانى الذى يعمل فى شارم الشيخ وصاصا ذهب الى شارم الشيخ منذ عامين ليعمل هناك غواصاً محترفاً بعد ان كان يعطى دروسا خاصة فى الغطس فى احد مدارس الغطس بالاسكندرية ولكن بعد حدوث مشكلة مع أحد اساتذته بالكلية الذى قرر ان يجعله يرسب فى مادته لصراعهما على كورس تدريس الغطس وحلفانه بأغلظ الايمانات ان لا يجعله يغطس مرة أخرى بالاسكندرية.ويقول صاصا "الحياة فى شارم مش سهلة زى الناس ما فاكرة ولو انت مش عارف انت عايز ايه حتضيع فى الرجلين ومحدش حيسأل فيك" . يتميز صاصا باتقانه اللغة الانجليزية والروسية وخفة ظله أثناء شرحه للسياح على المركب لانواع الاسماك التى سيشاهدونها تحت سطح البحر أثناء الغطس مما يجعل الناس يطلبونه بالاسم.

قصتنا الثانية بطلها طه جرسون فى مقهى على الممشى فى خليج نعمة ولكن شكله مختلف فشعره مصفف بعناية رشيق ولهجته بورسعيدية وتعامله راق جدا مع الزبائن وهو مالفت انتباهى وبشدة ناديته وتحدثت معه عن لهجته فأكد ظنونى انه من بورسعيد وتحدثنا عن بورسعيد وشارع طرح البحر والعمارات الجديدة التى تبنى هناك وتغتال الممشى الساحر لبورسعيد وجاء وقت السؤال التقليدى بتعمل ايه هنا؟ولكن الرد كان غريباً " بحاول أقول لوالدى وأعمامى انى مش محتاج فلوسهم فى حاجة وانى مش لازم اشتغل معاهم عشان ابقى راجل وانى ممكن ابنى نفسى لوحدى" طه يمتلك منزل خاص فى شارم الشيخ وسيارة ولكن مازل أهله غير مقتنعين بعمله لذلك هو مازل يعمل فى شارم وبينزل اجازة 3 أيام كل شهر.

عبده بطل قصتنا الثالثة والاخيرة عمره الخامسة عشرة وهو الذى انقذنى من السقوط من على ظهر الحصان – لما كنت عامل فيها بطل مصر فى ركوب الخيل - .عبده من الواحات الداخلة وله 28 أخت واخت من زيجات ابوه الاربعة ولا يعرف كل أخوته ولكنه نزح مع ابوه وامه وزوجة ابيه الثانية الى شارم للعمل.رغم ضئالة جسده فتقريبا عمل فى معظم الحرف اليدوية كالحدادة والنجارة والمحارة والسباكة الى ان استقر به الحال فى الصحراء فى أحد اسطبلات الخيول. يستطيع عبده ان يشدك الى حديثة عن الجبال والوانها وطبيعتها وخطورتها وايهما تستطيع ان تتسلقه وكيف والزاوية التى يجب ان تصعد بها والوضعية المثالية للنزول وكذلك انواع الخيول وترويضها. تسرب عبده من المدرسة فى صفه الرابع الابتدائى كما قال ليساعد عائلته ويأمل ان بعود مرة أخرى للمدرسة وسألنى بكل براءة "هوه انا ممكن أكلم الظابط اللى على الكمين يرجعنى المدرسة؟" الحقيقة أنى اتعلمت من عبده الكثير ولم أستطيع أن أرد على سؤاله وقلت له عن محو الامية لكن هو عايز يروح مدرسة ويلبس مريلة زى باقى العيال.

شارم الشيخ ببساطة هى الانسان قبل المكان.

أزاى تعرف انك فى شرم الشيخ؟؟؟

أزاى تعرف انك فى شرم الشيخ؟؟؟
1. وانت بتجهز للرحلة بتفكر فيها على اعتبار انها أكثر أهمية من كل رحلاتك لدول العالم الخارجى...لأيه مش عارف!!!
2. بتمر على حوالى بتاع 8 – 10 لجان قبل ما تدخل شرم الشيخ البلد.
3. بتقرا كمية يفط مرحبا بك فى سيناء – جنوب سيناء – السويس – شرم الشيخ – أدخلوا مصر ( اللى دخل دخل من زمان).
4. صعب أنك تلاحظ وجود نقاط اسعاف متعددة على الطريق....وفكرة الطريق الضيق التو وايز مازالت مستخدمة.
5. بتطلع محفظتك وناس بتشوف بطاقتك ورخصك على الطريق ده بمجموع عدد المرات اللى حصلت فى حياتك كلها.
6. بتشوف سلاسل لا نهائية من الجبال والقليل من العلامات الارشادية.
7. وانت راكب الاتوبيس المكيف اللى زى الفل الصراحة يعنى بتشوف حوالى 3 أفلام رايح و 3 أفلام راجع يعنى 6 أفلام فتزور وتكره السينما وحياتك كلها خاصة انهم ممكن يكرروا فيلم منهم.
8. تجد ان الاسلوب الوحيد للتعامل مع الحر هناك انك تقلع بدون اى خجل ليه؟؟؟ لان كل الناس قالعة ولو انت الوحيد اللى كنت لابس حتبقى مسخرة الممشى.
9. المكان الوحيد اللى قليل تلاقى حد مكتوب فى رقمه القومى مواليد شرم الشيخ.
10. بلد فيها عدد 2 مستشفى فقط وغير مجهزةولو عايز حاجة تروح مدينو الطور على بعد ساعة من شارم والبقية فى حياتك.
11. بردة مكان تقدر تلاقى فيه السيارات الفارهة والمتوسطة والبيتش باجى والخيل والجمال ماشية جنب بعضها عادى جدا ولا اكن فيه حاجة بتحصل.
12. من الاماكن القليلة اللى ممكن تلاقى فيها سياح قايمين الساعة سابعة الصبح عشان يتحرقوا – اه والله شفناهم محروقين – ويقولك بعمل تان!!!
13. البلد الوحيدة اللى ممكن تلاقى الصيدليات مش بتبيع أدوية لكن بتيبع لوشن وافتر صن وصن بلوك وصن بروتيكشن وسينستف هير و.....فياجرا وكلهم محطوطين فى واجهة الصيدلية.
14. كوباية الشاى ب 25 جنية.
15. ممكن الكافية يغير الموسيقى عشان فيه زبون تقيل قاعد ومعاه خمشتاشر سعتاشر مزة وعمال يدفع طلبات ومش حقول جنسيتة ايه عشان هوه من بلد عربى شقيق طلب كده...فأنت تتنرفز وتطلب المتر وتقول له عيب كده فيقولك الزبن – مش الزبون - عايز كده.
16. وانت داخل نعمة باى على الشمال تلاقى محل اسمه يحيى ديلفرى وجنبه علا طول ديليفرى يحيى!!!
17. لما تلاقى سعر أى حاجة مضروب فى 20 فمثلا سندوتش الفول ب 5 جندى لكن عند يحيى ديلفرى ب 2 جندى بس.
18. وانت داخل نعمة باى بردة تلاقى يافطة كبيييييرة مكتوب عليها welcome to USSR على فكرة اليافطة حمرا يعنى لونها أحمر.
19. لما تلاقى انك انت الوحيد اللى مش بتتكلم روسى فى البلد وتحس انك فجأة سافرت روسيا من غير لا فيزا ولا تذكرة طيران يبقى انت أكيد فى شرم الشيخ.
20. لما تلاقى عربية ليموزين طولها عشرميت متر قدام بودا وعربية بمبى قدام هارد روك وطابور قدام باش وكمية مزززززززز لا نهائية قدام باشا وكلهم لابسين أحمر يبقى انت فى شارم الشيخ.
21. من الاماكن الوحيد اللى ممكن تلاقى فيها جيلى فيش - مش قنديل البحر عشان انت ف شارم يا بيئة – صديق للسائح يبقى انت اكيد فى شارم ( أكيد يعنى تعب من كتر السحالى البيضاء اللى هناك...هاهاهاها أصل حرام دول يتلسعوا).
22. لما تركب تاكسى مجرد تعدى بيه الشارع ويطلب منك 30 جنية يبقى انت اكيد فى شارم.

وفى الختام نود أن نتوجه ل "باشا" – نايت كلوب – بتحية كبيرة بمناسبة احتفالة بمرور 6 سنوات على افتتاحه واحنا هناك ونشكرة على الشيرى نايت وعلى كمية المززز الرهيبة اللى رايحة جاية فى الممشى ولابسين أو بالاحرى مش لابسين حاجة لونها أحمر محدش كان فاهمها.

شترواس الزنجبيل.