الثورة الرقمية فى مؤتمر الإسكندرية الثانى للثقافة الرقمية

يفتتح الدكتور أسامة الفولى محافظ الإسكندرية والشاعر سعد عبد الرحمن رئيس الهيئة العامة لقصور الثقافة الأحد القادم 4 ديسمبر ولمدة يومين بقصر ثقافة التذوق بسيدى جابر بالإسكندرية مؤتمر الإسكندرية الثانى للثقافة الرقمية تحت عنوان "الثورة الرقمية وتشكيل المستقبل" يرأس المؤتمر هذا العام الدكتور زين عبد الهادى مدير دار الكتب المصرية وأستاذ علم المعلومات بجامعة حلوان.
ويقول د. زين عبد الهادى رئيس المؤتمر أن الثورة الرقمية قد أحدثت تغييرا جذريا فى العالم كله اقتصاديا وتجاريا وسياسيا وثقافيا، وغيره..، وقد تجلت آثار الثورة الرقمية هذا العام فى دورها فى ثورات ربيع الحرية العربية، كما يمكن أن يكون لهذه الثورة الرقمية دور أكبر فى حياتنا يجعلنا نستفيد أكثر من وقتنا وطاقاتنا بما يجعل شكل المستقبل أكثر فعالية ونفعا ويسرا، ومن هنا جاءت فكرة مؤتمر هذا العام، والذى نحرص خلاله على إلقاء الضوء على الثورة الرقمية والتعريف بها تقنيا، ودراسة دور الثورة الرقمية فى ثورات ربيع الحرية العربية وبالذات دورها فى ثورة 25 يناير، ودراسة الأشكال الجديدة من الكتابة والتى أفرزتها الثورة الرقمية، والتعرف على الآفاق المستقبلية التى يمكن أن تفتحها أمام مجتمعنا الثورة الرقمية فى المجالات المختلفة وبالذات فى المجال الثقافى والعلمى والاقتصادى والسياسى.
ويضيف حسام عبد القادر أمين عام المؤتمر أن المؤتمر يقدم خمس جلسات فى يومين، الأولى عن الإعلام الرقمى والثورة الرقمية ويتحدث فيها كل من الدكتور فوزى عبد الغنى عميد كلية الإعلام بجامعة فاروس، والدكتور أحمد إبراهيم والأستاذ جمال غيطاس رئيس تحرير مجلة لغة العصر والدكتور خالد عزب مدير إدارة الإعلام بمكتبة الإسكندرية والباحثة ولاء مسعد، والثانية حول مواقع التواصل الاجتماعى ودورها فى الثورة الرقمية ويتحدث فيها كل من الدكتور أحمد حسين من جامعة فاروس، ورانيا إبراهيم من المصرى اليوم، والباحثان محمد ريان وهشام علاء، والثالثة حول الثورة الرقمية وآفاق المستقبل ويتحدث فيها كل من الدكتور السيد نجم، والمهندس عبد الحميد بسيونى والدكتور شوكت المصرى والدكتور محمود الضبع، والرابعة يتم خلالها عرض مجموعة من المبادرات التى تمت على شبكة الإنترنت وساهمت فى الثورة الرقمية مثل مبادرة "صعيدى جيكس" و"تويت شارع" و"أول مكتب هندسى على الإنترنت" و"إذاعة سكندرية على الإنترنت" ثم الجلسة الخامسة يتم خلالها عرض لتجارب حية حيث يعرض كل من الكاتب والصحفى نبيل شرف الدين تجربته عن إيلاف وأزمة أون لاين، والإعلامى صلاح عبد الصبور عن تجربة الاتحاد العربى للصحافة الإلكترونية.
تتكون أمانة المؤتمر بالإضافة للدكتور زين عبد الهادى رئيسا وحسام عبد القادر أمينا عاما، الدكتور هيثم الحاج على سكرتيرا للمؤتمر والأديب منير عتيبة منسقا عاما للمؤتمر، وأحمد عصمت رئيسا للجنة الإعلامية والمهندس محمد حنفى مشرفا فنيا وتقنيا للمؤتمر، وسلوى توفيق مدير قصر التذوق وحازم عبد البر وكيل قصر ثقافة التذوق.

https://www.facebook.com/events/222721164465599/

مبنى محافظة الاسكندرية...لماذا حرق؟؟؟

Arabs...Be proud

This is is a very fast post...i just want you my dear readers to see the list of speakers...See the SMART faces of the Egyptians and Arabs in the internet and entrepreneurship world:
http://arabnet.me/conference/cairo/speakers/

Would you like to be a part of this organizations???Don't you think you can be among them one day???

Dream and work for your dream...

أليكس أاجندة ترعى مؤتمر عرب نت اعلاميا

أليكس أجندة ترعى مؤتمر عرب نت اعلاميا

مؤتمر عرب نت القاهرة

19-20 أكتوبر, 2011

القرية الذكية، القاهرة, مصر

http://arabnet.me/conference/cairo/

مش موضوعنا

مش موضوعنا

رمضان السنة ده جى فى وقت صعب جدا على مصر…البلد بتخرج كل اللى فى بطنها متكوم من سنين وسنين زى بالظبط تقليب البحر لبطنه فى المواسم لما بيجى ينظف نفسه بنفسه وبيرمى الاعشاب البحرية على الشاطىء…بس الحقيقة مش ده موضوعنا….

رمضان ومسلسلاته كهذا المسلسل الذى رفضه الناس بسبب الاغنية التى اذيعت قبل رمضان وبها كميات متنوعة من اللحوم المشكل ومسلسل الحسن والحسين الذى رفضه ايضا الناس بسبب اعتماده على روايه واحده لتلك الحقبة التاريخية من التاريخ الاسلامى والتى يطلق عليها مرحلة الفتنة الكبرى ومقتل الخليفة عثمان بن عفان والخلاف الذى حدث لمن يخلفه وحادثة كربلاء…وهى الفترة التاريخية التى لها تأويلات مختلفة لا يستطيع ان يتصدى لها مسلسل واحد…كذلك مسلسل محمود درويش الذى يطالب محبيه فى العالم العربى بوقف عرضه لما يحتويه - حسب كلامهم – من مغالطات تسىء لشكل الشاعر الكبير….ده برده مش موضوعنا.

رمضان واعلاناته مثل اعلان البوكسرات ومقارنتها فى شكل علاقتها بالشخص كعلاقة الصداقة واعلان بريل واسترجل( الحقيقة لا اعرف علاقة شرب البيريل بالاسترجال) واعلان أحد انواع البوتجازات..وكمان ده مش موضوعنا.

موضوعنا هو فكرة الحرية…الحرية فى الاصل هى حق مكتسب لا تعطى…وهو التعريف البسيط الذى قد لا يختلف عليه الاغلب الاعم من الناس…

بناءاً على ما سبق برجاء الاجابة عن الاسئلة التالية:

السؤال الاول: هل الناس مستاءة لعرض كل هذا فى رمضان؟؟؟ بمعنى لو تم عرضه فى غير رمضان فلا توجد مشكلة؟؟؟

ملحوظة: رب رمضان هو رب باقى الشهور.

السؤال الثانى: هل المشكلة ان كل هذا يعتبر نوع من انواع شد الانتباه لعمل درامى او اعلان لجذب المزيد من الاعلانات؟؟؟

ملحوظة: التجارة شطارة.

السؤال الثالث: هل المطلوب هو فتح باب الحريات - المكتسبة كما قلنا - والشعب عليه ان يختار الغث من السمين؟؟؟

ملحوظة: الشعوب تقاتل من اجل حريتها

السؤال الرابع: هل المطلوب رقابة من نوعية الاضرار بالذوق العام؟؟؟

ملحوظة: ثبت فشلها سابقا

الاسئلة السابقة كلها اجبارية والزمن المحدد لاجابتها حتى 18 سبتمبر المقبل….البناء لن يستقيم سوى بالسير على خطوط متوازية.

التعليم هو الحل.

صرخة...أغنية لمصطفى سعد

تدوينة ضد التحرش الجنسى

تدوينة ضد التحرش الجنسى
قصص سريعة جدا...التربية هى الحل

قصة سريعة لما كنا فى درس الاحياء وجينا عند الفصل بتاع الاعضاء التناسلية المدرس فى البرايفت – معلش اصلى كنت لغات مشترك صبيان وبنات يعنى – فصل الولاد عن البنات فى الفصل ده بالذات وطبعا كان ده بناء على فكره ان عيب الاتنين يقعدوا مع بعض فى البرايفت يسمعوا الكلام ده رغم انهم بيسمعوه فى الفصل مع بعض!!!

فكرة فصل الطلبة عن الطالبات فى المدارس فكرة بتساعد على زيادة الغموض فى طريقة التعامل بينهم وبتخلى الخيال بتاعهم يسرح فى وجود عامل محفز زى الافلام والانترنت – ده مش ادانة للاتنين – لكن فيه مشكلة تتوارثها الاجيال حول الكائن المسمى بالذكر والكائن المسمى بالانثى...

اخدكم لقصة تانية لما دخلنا الجامعة كان فيه حاجة غريبة ومكنتش فاهمها ساعتها ...طريقة نظرات الشباب للشابات بتوع سنة اولى...قعدت فترة على فكرة الموضوع ده مش فاهمة بس كنت استدعى المثل القائل" كل غربال جديد وله شدة...خاصة ان الشابات كنت تحس انهم طالعين من تحت ايدك الكوافير " الحلاق الحريمى" كل يوم...ماكياج ايه ولبس ايه وشعر ايه واكسسوارات ايه " طبعا ده كله بيتحطم بعد اول ترم".

المهم ان بعد شوية كده سألت وكان الرد..ايه يا مان المزز جم لحد عندنا بدل ما كنا بنروحلهم لحد المدارس ونتمسك وننضرب!!!

الموضوع ده حاولت اناقشه فى اول عدد من مجلة الكلية بس طبعا متنشرش...

الموضوع كتالى طلبة وطالبات منفصلين عن بعض فى المدارس الحكومية وميعرفوش عن بعض غير القصص والحواديت والغييرات الفسيولوجية ودروس الاحياء والجهاز التناسلى للضفدع -اللى جالنا فى الامتحان- بيدخلوا الكليات ومطلوب منهم انهم يتعاملوا مع بعض بشكل طبيعى...طب ازاى!!!


يا ناس التربية هى الحل...
لو الاباء يربون ابنائهم على اسس سليمة ان الذكر والانثى مخلوقات خلقها الله فى الارض لاعمارها وان فكرة المودة والرحمة هى الاساس فى العلاقة وتقبيح الاساليب الرخيصة فى تعامل كلا الطرفين مع الاخر...اعتقد ان التنشئة السليمة هى الطريق الى حل هذه المشكلة.

مبادرة "تكريم"

مبادرة "تكريم"
أضغط على الصورة للمزيد من المعلومات

اسكندريلا... مين اللى يقدر ساعة يحبس مصر ولا حد

اسكندريلا... مين اللى يقدر ساعة يحبس مصر ولا حد


حالة فنية شديدة الخصوصية تقدمها لنا فرقة اسكندريلا الغنائية فى امسياتها مستمرين على نفس نهجهم الذين ساروا عليه منذ بداياتهم فى الغناء المسرحى بطريقة سهلة يفهمها الناس وتدخل قلوبهم وتتغلل فى شريانهم وتبث فى روحهم القوة والثورة .

حتى أسم الفرقة جاء فنيا بحتا فهو خليط من عروس المتوسط الاسكندرية - التى ولد ونشأ فيها حازم شاهين وكون فيها الفرقة بشكلها الاول عام2000 قبل انتقاله للقاهرة- ودلال السندريلا فى مزيج بديع مشتق من اوبريت لخميس عز العرب ... واسكندريلا من المهتمين باحياء تراث سيد درويش والشيخ إمام عيسى فى المقام الاول كما انهم يغنون اشعار الراحليين صلاح جاهين وفؤاد حداد والرائع أحمد فؤاد نجم واحمد حداد وغيرهم.

حفل الفريق الاخير الذى حضره الالاف ملئوا القاعة الكبرى بمكتبة الاسكندرية أثبت صحة مقولة "الشعب يريد الفن الهادف البناء" البعيد عن الاسفاف و"السلق" لمسايرة فكرة التواكب مع الثورة مما ادى الى التمييع الشديد فى التعبير عنها.

أسكندريلا قدمت اغانى نابعة من ثورة 25 يناير كما قدموا أغان قديمة تشعر انها كتبت بالامس فقط تعبر بواقيعة شديدة عن الحالة المصرية الان فلا تعلم ان كان الشيخ امام والشيخ سيد درويش غنوها كنوع من أنواع التنبؤ بالمستقبل ام ان الدورة التاريخية للحياة المصرية تدور وتبدأ دورتها الجديدة!!!

أغانى اسكندريلا التى قدموها بها من روح الثورة ما يجعلها فعلا صوتا حقيقيا لها فحينما غنوا يا مصر قومى وشدى الحيل…كل اللى تتمنيه عندى لا القهر يطويني ولا الليل تعالت صيحات الحضور بشكل كبير ومتواصل وحين قالوا هات لى يا بكره صفحة...حطلى مصر فى جملة مفيدة عمت الفرحة القاعة ومع كلمات اغنية راجعين " الشعب يريد الورد فى البساتين الورد يريد الشعب فى الميادين الشمس اكيد حتنور السنين والنصر نشيد غناه المصريين" شحذت الهمم فعلا.

كلمات اغنية "مانتاش اخويا يا شهيد انت انا انا اللي مت بصلي في بداية السنة وفي الجراح المؤلمة مانتاش لوحدك دي مظلمة وحزينة حياتنا كلنا مانتاش اخويا يا شهيد انت أنا" ذكرت الجميع بشهداء مصر الذين دفعوا دمائهم فى الثورات والحروب على مر تاريخها وعلى وجه الخصوص ثورة 25 يناير التى لم يحصى حتى الان العدد الاجمالى الدقيق للشهداء والمصابين فيها وربما تذكروا هؤلاء الذين قتلتهم اسرائيل بدم بارد أعقاب نكسة 1967.

الفرقة لم تنسى الإسكندرية مسقط رأسها فغنت اقروا الفاتحة لأبوالعباس ببدايتها الفلكلورية المعروفة لكن بشكل جدبد وأضافوا اقروا الفتحة لعهد جديد/ دي مصر قايمة الفجر وعيد/ مافيهوش خلاص اسياد وعبيد/ لكن عدالة لكل الناس/ حركتوا بالوطنية جموع/ بإراد لها شكل وموضوع/ من النهاردة مفيش ممنوع/ ولا حق للشعب حينداس.. القبطي والمسلم أخين/ ملو الأمل والروح والعين/ دفعوا التمن همالتنين/ فتح شهيدنا بدمه طريق/ وبتحيا مصر تبل الريق.

على مر التاريخ كانت لثورات مصر اصواتها التى تقدمها بشكل متميز فسيد درويش غنى لثورة 1919 وعبد الحليم تغنى لثورة 1952 واعتقد ان اسكندريلا حازم شاهين ورفاقه سامية جاهين وايه حميدة وايمن مبروك وشادى مؤنس وأشرف نجاتى ونور بهجت مؤهلين بأصواتهم والحانهم المميزة لان تكون صوت ثورة 25 يناير 2011 .

مبقتش الحرية بعيدة

الإسكندرية بالامس

الإسكندرية بالامس

الثلاثاء 24 مايو 2011 تاريخ لا يعنى أى شىء...يوم فى منتصف الاسبوع البعض يكرهه لانه يوم ملهوش لازمه حسب البعض واخرون يحبونه لان الجمعة اى الاجازة بعده بيومين.
الثلاثاء 24 مايو 2011 الاخوان يدعون لحائط بشرى على البحر
الثلاثاء 24 مايو 2011 ندوة الناسخ والمنسوخ فى صالون زمرة
الثلاثاء 24 مايو 2011 ندوة الشعب والشرطة معا لعودة الامن والاستقرار

كم الاحداث التى وقعت هذا اليوم ليست بالكثيرة ولكنها تتصف بالدسامة والخطورة فى ذات الوقت...

الثلاثاء 24 مايو 2011 ندوة الشعب والشرطة معا لعودة الامن والاستقرار
الندوة حاولت مجموعة بنحب الحياة التى يرأسها أشرف مرقص عقدها بالمكتبة قبل فترة وشهدت احداثها واقعة تبديل القاعات فى اخر لحظة والغيت الندوة ودارت مجموعة من الحوارات الغاضبة حضرتها بنفسى حول الالغاء وعلى من تقع المسئولية... ثم حدد الامس لعقد ندوة المصالحة بين الشرطة والشعب وما لا افهمه لماذا تتم ندوة للصلح داخل قاعة مغلقة؟؟؟ وهل الشعب والشرطة فى حاحة للمصالحة الان؟؟؟ ولماذا تلك السرية والتى كانت فى الاساس هى سبب الشائعات؟؟؟ الشعب يريد الامن والامان والشرطة لابد لها من ان تعود وبقوة للشوارع...المصالحة لابد ان تكون عملية وان يشعر بها المواطن نفسه ...الشرطة عليها ان تعمل بكامل طاقاتها خاصة ونحن مقبلون على امتحانات ودخول الصيف وشهر رمضان.

اما مكتبة الاسكندرية عليها الان ان تعود الى ما كانت عليه من حيث التروى فى اختيار الاحداث - ولا أعنى هنا النخب- التى تستضيفها داخل قاعاتها...مكتبة الاسكندرية التى حماها الشباب فعليا وأقاموا حولها جدارا بشريا – قبل ان يتفتق ذهن احد كبارها عن فكرة العلم - لابد ان يشعر المواطنون انها فعلا تتحدث عنهم وبأسمهم وان يحولوا دون القلة التى تحاول هدمها معنويا فلم نكون سعداء لو شاهدنا حريق مكتبة الاسكندرية فى عام الثورة.

الثلاثاء 24 مايو 2011 ندوة الناسخ والمنسوخ فى صالون زمرة
صالون زمرة الثقافى هو احد الصالونات التى تسعى لتأسيس ثقافة الحوار ويحاول ان يتحول من النخبوية التى اتسم بها من حيث الحضور ونوعية المناقشات...ورغم ان موضوع الناسخ والمنسوخ فى الانجيل والقرآن هو خارج سياق الاحداث الا انه كان الموضوع الذى اختاره المخرج مارك لطفى لندوته...الغريب ان عدد الحضور فاق كل المرات السابقة رغم صعوبة الموضوع وغرابه ان يتكلم فيه مسيحي.

مارك تناول موضوع الناسخ والمنسوخ بموضوعية شديده فى الانجيل والقرآن الكريم وكان الحضور من الرقى فى مناقشاتهم ما أعطى الندوة رحابه فى تداول الحوار وايضا...الجدال.

الغريب ان الجدال لم يكن اسلامى مسيحى او مسيحى اسلامى بل كان مسيحى مسيحى واسلامى اسلامى بمعنى ان اثنان مسيحيان اشبكا فى حوار واثنتين مسلمتين اشتبكتا فى حوار....الحقيقة كنت سعيدا جدا بمستوى الحوار وتمني ان يعقد فى الشوارع على المقاهى طبعا مع تغيير الموضوع.

الثلاثاء 24 مايو 2011 الاخوان يدعون لحائط بشرى على البحر
أنا تجارى ولم أفوض احد للحديث بأسمى كى أرى لافته مكتوب جموع التجاريين وتحتها الاخوان ..اذا كان هناك من يريد ان يتحدث فليكتب اسمه بجانب ما يقوله...انا ضد اقصاء اى فصيل من الحياة ولكنى ضد ان يتحدث أحد اى من كان باسمى دون تفويض.>>>الوقفة لم تنجح لوم يشارك بها سوى الاخوان أنفسهم.

ع السريع 15

ع السريع 15
لما نبقى فى ندوة عن الدولة المدنية وسيدة تطالب بحماية دولية لحماية الاقباط يبقى فيه حاجة غلط.
لما شيخ بدقن يقول منبقاش رجالة لو محرقناش الكنائس يبقى فيه حاجة غلط.
لما تبقى الندالة كنز لا يفنى يبقى اكيد فيه حاجة غلط.
لما صحفية محترمة وزى الفل بتشتغل فى الصحافة من أربعة سنين وتقول ده اول مرة احضر ورشة عمل يبقى اكيد في حاجة غلط.
لما صحفى يرفض يحضر ورشة عمل عشان المدرب أصغر منه فى السن ومعاه ماجستير وهو نقابى يبقى اكيد فى حاجة غلط.
لما الناس تلصق طول لسان البعض فى الحديث على اعتبار انها من نتائج الثورة يبقى اكيد فيه حاجة غلط.
لما تتحول المظاهرات المنادية بالحرية لمظاهرات انا عايز اختى وانا مش عايز المادة التانية من الدستور يبقى أكيد فى حاجة غلط.
لما صحفى كبير يؤمر صحفيات جدد بإزالة صورهن من على الفيس بوك درءا للشبهات يبقى أكيد فيه حاجة غلط.
لما المرور يعمل اشارة مرور اتوماتيك بعداد تنازلى والعسكرى ميعرفش يستخدمها وتبوظ فى أقل من شهر من تركيبها يبقى اكيد فيه حاجة غلط.
لما يصدر حكم بالاعدام على عسكرى صغير عشان قتل المتظاهرين ورؤسائه لا يبقى أكيد فيه حاجة غلط.

الاعزاء يمكنكم تكملة القائمة وادارج ما ترونه مناسبا....فلنكتب معا

أحمد عصمت

من أجل مصر|مناظرة عمرو حمزاوي و صبحي صالح - جـ 10

من أجل مصر| مناظرة عمرو حمزاوي و صبحي صالح - جـ 9

من أجل مصر| مناظرة عمرو حمزاوي و صبحي صالح - جـ 8

من أجل مصر| مناظرة عمرو حمزاوي و صبحي صالح - جـ 8

من أجل مصر| مناظرة عمرو حمزاوي و صبحي صالح - جـ 8

من أجل مصر| مناظرة عمرو حمزاوي و صبحي صالح - جـ 7

من أجل مصر| مناظرة عمرو حمزاوي و صبحي صالح - جـ 6

جبهة مصر الحرة :أ.د / عمرو حمزاوي و أ/ صبحي صالح - ج5

من أجل مصر| مناظرة عمرو حمزاوي و صبحي صالح - جـ 4

من أجل مصر| مناظرة عمرو حمزاوي و صبحي صالح - جـ 3

من أجل مصر| مناظرة عمرو حمزاوي و صبحي صالح - جـ 2

من أجل مصر| مناظرة عمرو حمزاوي و صبحي صالح - جـ 1

كلمنى اكتر عن مصر

السلام عليكم ورحمة الله وبركاته
صباح الخير أعزائى المواطنين
عمتم صباحا
جوود مورنيج
بونجور

المهم مصر وصلت لمرحلة ان يبقى فيها مناظرات وكل واحد حر فى اللى عايز يقوله ...مناسبة كلامى ده هو المناظره التى عقدت بالامس فى مدرجات كلية الحقوق بالمجمع النظرى اللى مدخلتهوش من سنين وشكله اتغير خالص وده موضوع نتكلم فيه بعدين.

كان من المفترض ان تكون المناظرة بمكتبة الاسكندرية ولظروف ما تغير المكان الى كلية الحقوق وكان ايضا من المفترض ان ينظمها شباب مجموعة بصمة ولكن سيطر علي التنظيم شباب الاخوان – رغم ان اللى دخلنى القاعة من الباب الخلفى شاب اخوانى فى قمة الاحترام مع أخرين – وسيطرت شباب الاخوان جاءت فجاة كما قالت أحدى فتيات مجموعة بصمة ( كانت لابسه النيم تاج وبدله رمادى فاتح وبلوزة خضراء عشان الدقة).

دخول القاعات كان فى منتهى الصعوبة من قبل الحضور وايضا من قبل الضيوف ووضعت شاشات عرض وبروجيكتورات فى ساحات كلية الحقوق وان كان قد عابها الصوت المتقطع جراء نقل حوالى 8 مايكروفونات للمتحدثون جميعا.

استقبل الحضور حمزاوى وصالح او صالح وحمزاوى( مع الاحتفاظ بالالقاب) بهتاف كلنا أيد واحدة...كلنا مع بعض وتصفيق حاد والزحام كان رهيب جدا وكان نصيبى مع مجموعة من الصحفيين المحترمين على الاستيدج حيث تم دفعنا بكل الوسائل بالكتف والكوع واليد وتربعنا على الارض للكتابة واستخدم الزملاء المصورين مجموعة متنوعة من الحركات الاكروباتية للحصول على أفضل طريق للتصوير. ( تنويه: رجاء حار لما تشوفوا واحد بيصور او بيكتب او بيسجل أعطوا له مساحة ميبقاش الشغل وانتو علينا يعنى).

بدأت المناظرة بحديث الاستاذ صبحى صالح عن انه لا حديث على فصل الدين عن الدولة فالاسلام دين و دولة
الذى يفصل السياسة عن الدين ايات الاحكام وهى 600 ايه موزعه على كل القانون فهل نلغيهم .

ثم انتقلت المايكروفونات الى الدكتور عمرو حمزاوى الذى اكد عن انه لا فصل للدين عن السياسة وانما تنظيم العلاقة بين الدين والسياسة وانه لابد من تقديم مبدأ المواطنة ولا انتقاص اوتمييز فى الحقوق السياسية او المادية خاصة وان هناك مرجعيات اخرى لابد من وضعها فى الاعتبار وأشار الى ضرورة الفصل بين ممارسة السياسة والمهمة الدعوية خاصة وان ادخال الدين فى السياسة يضر بالدين وان لا احد يستطيع احتكار الحديث بأسم الدين.

وفى اجابته عن دور المرأة في السياسة من منظور التيار الإسلامي قال الاستاذ صبحى صالح "المرأة فى الاسلام امرلا تعرفه البشرية قط ، فما عظم اى نظام المرأه كما عظمها الاسلام ، فالعالم كان يفكر حتى القرن 18 هل هى مخلوق شيطانى ام مخلوق نجس والمرأه في الاسلام محموله وهى بنت على ابوه و هى زوجه على زوجها وهى كبيره على ابنائها؛ المرأه كانت نصف الاسلام حين بايعت الرسول عائشه و أول شهيده في الاسلام صفيه و الرسول قال خذوا دينكم من هذه الحورياء . في صلح الحديبية حين أبى الناس الصلح و دخل الرسول غاضبا قالت أم سلمه اخرج عليهم و افعل فأنهم إن شاء الله فاعلون فاستقامت الأمه على رأى أم سلمه .المرأه حتى الآن فى الغرب لا ذمة مالية لها بينما فى الإسلام لها ذمة مالية منفصلة ليس لأى مخلوق التدخل فهى عزيزة مصونة فى الاسلام .و ما قلته ليس رأى الاخوان هذا هو الاسلام المرأة تنفرد بأثنى عشر حالة بميراث اكثر من الرجل وليس نصف كما يقول الناس ما أعظم الإسلام حين كرم المرأه .

ورد الدكتور عمرو حمزاوى جئت هنا لمناظرة الأخوان المسلمين وليس الدين الأسلامى ولا اختلف على تقدير الإسلام للمرأه فالإسلام أعز المرأه... المناظره للحديث عن رؤى و افكار ليست عن دور الاسلام .
وأعلن الاستاذ صبحي صالح تقدمه بطلب للانضمام لحزب الاخوان واشار الى ان الحزب مازال فى طور التأسيس وسيكون كيان سياسى يخضع لأحكام القانون وسلطات الأدارة والمراقبة ستكون من الجمعية العمومية للحزب .

الليبرالية والإقتصاد قال عنهم الدكتور عمرو حمزاوى الأفكار الليبرالية من مبادئها هى الحرية الكاملة بضوابط لصالح المجتمع وهى عبارة عن تكافىء الفرص وسيادة القانون؛ الليبراليه قادره على عمل نظام اقتصادى يضمن كل شئ للمواطنين الطعام و الشراب و العلاج لابد من العدالة الاجتماعية و المعونات الاقتصادية ولدينا تجربة فى تركيا حزب العدالة و التنمية ( حزب الاخوان ) وماليزيا و اندونسيا و لهم مرجعية اسلامية بنظام اقتصادى ليبرالى اسلامى مشترك. وأكد ان الديمقراطية اساس لكل شيء ويجب ان يكون السوق المصرى حر

واختتم حمزاوى كلامه بانه لا اقصاء لاى فصيل سياسى لا الاخوان ولا غيرهم وان اتاحت حرية للتعبير مكفوله للجميع ولا لتخوين اى فصيل مصرى وضرورة الالتزام بسيادة القانون والامركزية الاخذ بنظام الانتخاب بدل التعيين.

تعليقى الشخصى:
1- تنظيم المناظرة سىء للغاية واذا كان اختيار المكان لانقاذ ما يمكن انقاذه فهو ما انعكس سلبيا على المناظرة فكان يمكن ان تقام فى مكان اوسع عندكم مجمع الانشطة الطلابية او حتى ملعب هندسة والاتنين امنيا زى الفل.
2- يا شباب تنظيم المؤتمرات والنددوات لابد من اختيار اشخاص محددة المواصفات للاشتراك فيه اهم هذه الصفات معرفتهم كيفية التعامل مع البشر وكلامى واضح جدا الصياح والخبط واطلع بره وانا سيدك وانا مدخلك شفقة واحسان وحسنة وانا سيدك ....عيب.
3- راجل محترم فى سن والدى طلع فى وسط المحاضرة قال لا اله الا الله والحقيقة مكنتش اعرف ان كلمة التوحيد عبارة عن صيحة اثارة حيث كانت هذه الصيحة اول اشارات كسر النظام والحقيقة ان من كانوا بجواره اجلسوه عنوه.
4- حصل حوالى 6 خناقات فى المناظرة كلهم بدون داعى ...يا شباب التروى ثم التروى ثم التروى.
5- اساسا عنوان المناظرة اختيار سىء ايضا فالتيار الاسلامى يمثله الازهر والسلف والاخوان وغيرهم والاصح كان ان تكون بين الاخوان المسلمين والليبرالية.
6- ممتاز جدا ان يعتاد الناس على المناظرات العلنية وادابها واساليبها.
7- التصفيق الحاد قبل الكلام وبعد الكلام واثناء الكلام ملهوش أى معنى....لا حمزاوى ولا صالح نازلين الانتخابات وليس بالتصفيق نعبر عن وجهات نظرنا.
8- من غير حلفان لا الليبرالية معناها ان الناس تمشى عريانه فى الشارع ولا الاسلامية معناها قطع رقاب الناس فى الشوارع....تسطيح الامور والافكار بهذا الشكل المخل قد يؤدى الى دماء فى الشوارع.
9- هناك فرق شاسع وبون ما بين الليبرالية الفكرية والليبرالية السياسية.
10- وأخيرا....لو فضلنا نصفق على طول مش حنلاقى وقت نشتغل...أظن واضح.

ع السريع 14 فقه الاولويات عشان مصر والانتخابات

ع السريع 14
فقه الاولويات عشان مصر والانتخابات

1- بعد ما الثورة قامت يوم 25 يناير وماتبع ذلك من موقعة الجحش فى التحرير وتبعيات فكرة الثورة المضادة والضرب والاهانة والمسخرة اللى حصلت وبعدين لما قابلت صديق من الحزب الوطنى وقال لى بالحرف احنا سايبنكم تجيبوا اخركم...انتم فاكرين انها سايبه...الانتخابات جايه تجرى...الدنيا دارت بيا وحسيت انى على كوكو تانى غير كوكو الارض...لو شاب زى الفل بيفكر بالطريقة ده وبيقول الكلام ده على الملأ يبقى ايه الكلام بعد كده؟؟؟

2- رغم انى مش من مؤيدى ثقافة إقصاء اى فصيل من الحياة السياسية لكن واضح ان حيبقى لكل قاعدة شواذ والظاهر كمان ان فيه ناس لازم تتمنع من ممارسة الحياة السياسية لفترة.

3- انشغلنا فى نعم ولا ولقينا ان نعم عشان الجنة ولا بتودى النار وبعد ال 77%نعم لقينا غزوة الصناديق واللى مش عاجبه يروح كندا واصلى كنت بهزر ....وشومان لازم يعتذر من نفس المكان اللى تكلم فيه اول مرة.

4- بمب وصواريخ والحق يا عم الناس السرقة فى كل مكان ومحدش يخرج من بيته واسلحة بيضا مالية الشوارع.

5- هيصة الترشح لانتخابات الجمهورية...لما كل الناس ده نازلة الانتخابات امال مين اللى حيتحكم رغم ان التعددية كويسة عشان نختار براحتنا بقى بس مش كده يعنى.

6- التخبيط مع الجيش .

7- ليه احنا ناسيين ان فيه انتخابات برلمانية قربت ومحدش واخد باله منها ولا بيتكلم عليها وقبل الانتخابات الرئاسية؟؟؟ المصيبة اننا عارفين مين اللى نازل فى الرئاسة ومش عارفين مين اللى نازل مجلس الشعب والشورى... هيا ان شاء الله حتبقى مفاجاة سوربرايز يعنى ولا ايه؟؟؟

يا ناس فيه اختراع اسمه فقه الاولويات وده معناها ان الاقرب فالاقرب وان يبقى عندك هدف محدد ماشى وراه ...اكلمكم بالبلدى اكتر من كده ايه بس ماشى اعتبر انك رايح تجيب عيش من الفرن اللى فى رايح اخر الشارع وفاضل 5 دقائق ويقفل وطول الشارع عيال صغيره بتلعب كورة وكل شوية يخبطوك بيها تمشى وتروح تجيب العيش وبعدين ترجع تقطع الكوره وتقطع لهم هدومهم ولا تمسك فيهم وتسيب الفرن يقفل؟؟؟؟

على فكرة الفرن لو قفل المره ده من غير ما نجيب عيش سخن وقابب...مش حنعرف حتى ناكل عيش ناشف مقدد...

عالم الاعلان وثورة 25 يناير

عالم الاعلان وثورة 25 يناير
كتبت اول فبراير 2011
الاعلان - بالنون وليس بالميم - هو احد الادوات التى يعتمد عليها التسويق فى الترويج للمنتجات على اختلاف انواعها واستخداماتها وبالتالى فهو يعتمد اعتمادا كلىا على وجود نوعيات مختلفة من المنتجات التى قد نختلف او نتفق عليها فما قد يكون مهما لى قد لا يكون كذلك بالنسبة للاخرين والعكس صحيح.

وكان سوق الاعلانات فى العالم وليس فى مصر فقط قد تعرض الى هزة عنيفة عام 2009 بسبب الازمة المالية العالمية مازال لم يتعافى منها حتى الان وهو ما ادى الى تقلص الانفاق الاعلانى بنسب تراوحت ما بين 20% و 35% وفقا لدراسة أعدتها مجموعة باراك للأبحاث.

وبالطبع لاحظ الكثيرون تقلص عدد الجرائد – والحكومية على وجه الخصوص – فأصبحت أثنى عشر صفحة بعد أن كانت أربعون أو ستة وثلاثون صفحة ليس لانهم لا يجدون ما يكتبونه وهذه حقيقة ولكن لان الاعلانات التى كانت تشغل معظم الصفحات لم تعد موجودة.

سوق الاعلان فى مصر بعد ثورة 25 يناير بالتاكيد سيتغير مساره شانه شان باقى الاعمال فى مصر لمواكبة الاحداث الاخيرة لمحاولة التقليل من خسائره جراء احجام بعض الشركات عن القيام بحملات اعلانية كبرى حتى استقرار الاوضاع .

التغيير الاعلانى بدا بالفعل وطرا على معظم الاعلانات خاصة التى تخص البنوك فاتخذ احد أشهر البنوك الحكومية العاملة فى مصر شعارا " تحيا مصر" و " يحيا شعب مصر" متصدرا اعلاناته بدلا من اسم البنك الذى كان يستولى على المساحة الاكبر فى السابق.

تأثير الفيس بوك وتويتر والشعارات التى تخرج منها أعلن عن نفسه واضحا جدا فى هذا المجال بعد ان استخدم بنك اخر شعار أحدى الحملات على الانترنت " من النهاردة دي بلدك انت، ماترميش زبالة، ماتكسرش إشارة، ماتدفعش رشوة، ماتزوّرش ورقة، اشتكي أي جهة تقصّر في شغلها "مع رفع علم مصر.

بنك ثالث غير من صيغة اعلاناته نهائيا وطوعها لخدمة فكرة الاستثمار فى البورصة تحت شعار" من أجل مصر" وتخلى عن وضع شعاره فى منتصف الاعلان واستخدم اسلوب الشرح بالكلمات لتوصيل المعلومة بشكل مباشر وواضح فى برواز من ثلاثة الوان هى علم مصر.

الاشاعات التى راجت خلال الفترة الماضية خلقت نوعية اخرى من الاعلانات والتى قامت بها بعض الشركات لتكذيب تلك الاشاعات على مساحات وصلت لصفحات كاملة فى جرائد مستقلة على اعتبار انها الاكثر قراءة وراوجا الان بعد ان فشلت الجرائد الحكومية كالمعتاد – وهو ما سنتحدث عنه فيما بعد – حتى ان كبرى شركات الدعاية والاعلان فى مصر والتى كانت تحصل على نصيب الاسد من الاعلانات الحكومية فى الفترة السابقة سارعت بنشر اعلان لنفى اشتراكها فى حملة اعلانية لوزارة وضع وزيرها الان قيد التحقيق .

ماذا بعد؟؟
المتوقع ان تتجه ميزانيات الحملات الاعلانية الفترة القادمة تجاه الاعلانات الاجتماعية التى تناقش بعض من أهم قضايا المجتمع المصرى مثل الوعى الأسرى، دعم الإبداع، المشاركة السياسية ودعم عملية البناء وتنشيط السياحة الداخلية وبناء الثقة وغيرها.

ثورة الشباب والتطوع

ثورة الشباب والتطوع

ثورتنا... ثورة شباب 25 يناير أعطت معانى كثيرة للحياة التى نعيشها...ونحن مازلنا نتحدث عن ثورة قامت على اكتاف الشباب فى موعدها المحدد مسبقا... لا يستطيع احد ان يدعى فهمه الكامل بما جرى وسنحتاج الى سنوات عدة كى نهضم ونفهم ما حدث.

إن ما حدث دفع وبقوة طاقة الادرنالين فى عروق الوطن وشبابه...وهنا انا لا اتحدث عن الشباب المتطوع او الايجابى الذى يعمل فى مجالات المجتمع المدنى - وإن كنا سنتحدث عنهم لاحقاً – ولكن الحديث هنا عن الشباب الذى أطلق عليه " الشباب السيس" الشباب أبو شعر طويل وبنطلون ساقط وملابس داخليه ظاهرة يقضى صيفه ما بين مارينا والعين السخنه ...شباب الجامعات الخاصة والسيارات الفارهة... ذلك الشباب الذى ظهر دوره واضحا فى التحرير وفى الاسكندرية وستظل صورة "الشهيد على" – أحد هؤلاء الشباب – والذى ضحى بنفسه ليحمى سيده لا يعرفها من الرصاص المطاطى حاضره لتؤكد لكل العاملين فى مجال العمل الشبابى والتطوعى أنهم قد جانبهم الصواب فى تقديرهولاء الشباب مرتين؛ الاولى حين اطلق عليهم لقب "سيس" والثانية لعدم القدره على تفهم حاجاتهم وجذبهم نحو فكره التطوع الفعالة والتى آن اوانها الان؛ وإن كان هذا لا ينفى اقصائهم لانفسهم فى الفترات السابقة.

على الجانب الاخر... الشباب المتمرس فى العمل المجتمعى والتطوعى كان له رأيه هو الاخر فقرر انه لن يسكت بعد اليوم على إهدار طاقاته لاى مؤسسة مهما كان حجمها لخدمة اهداف اشخاص بعينهم فنظموا انفسهم بعيدا عن كافة المؤسسات... رفعوا القمامة من شوارع الاسكندرية وقاموا بدهان محطات الترام كما قدموا مجموعة تبرعات نقدية لعدد كبير من العاملين باليومية خلال فترات توقف العمل وحظر التجول ولا ننسى دورهم فى تشكيل اللجان الشعبية؛ اجتماعاتهم على المقاهى وعلى البحر دون الحاجة للقاعات المكيفة والان يعملون على تنظيم انفسهم لحماية حقوقهم البسيطة التى لا تتعدى الاحترام والتكريم المناسب.

ماذا بعد؟؟
ظهر أيضا فى حملات التطوع بعد 25 يناير نسبة كبيرة جدا من الشباب أصحاب السن الصغير ما بين 13 و17 سنة...هم من يطلق عليهم المراهقين كانوا من المجموعات الاكثر فاعليه وحماسه وهو ما يتطلب برامج خاصة لاعداد تلك المجموعات إعدادا قويا بما يتناسب مع محددات فئتهم العمرية وبما يضمن استمرارهم فى مجموعات التطوع.

المرحلة القادمة تحتاج الى نوعية جديدة من حملات التوعية لمختلف الفئات العمرية للتعرف على دستور بدلا من ان يسمعوا عن تعديلات وتغييرات لا يعرفون اساسها وبرامج خاصة بفكره واجبات المواطن وحقوقه وبرامج لبناء قدرات مختلفة توجه للمناطق العشوائية والتى على اطراف المدن الرئيسية وكذلك برامج خاصة بتمكين الشباب من أستخدام ادوات الاعلام الجديد بشكل اكثر فاعلية للوصول لقاعدة عريضة تعمل على نشر ثقافة صحافة المواطن.

أبنى وثورة 25 يناير

أبنى وثورة 25 يناير

تدور الاحداث عام 2028 بالظبط على اعتبار انى حتجوز كمان سنة ولا حاجة وحخلف عيل فرقع لوز حيتولد لابس نظارة من كتر القرايه ان شاء الله واعمل له ليزك لما يبقى عنده 21 سنة.

وبما اننا حنكون فى دنيا كلها توماتيكى توماتيكى فمسكت الريموت عشان ارن على قوضة الواد ابنى عشان ادخل اطمن عليه – شايفين الاب المحترم اللى بيرن على ابنه قبل ما يدخل علي ومش بدخل زى الاعصار عشان اقفشه متلبس بيقرا ومش بيذاكر – لقيت الواد عمال يلف فى القوضة وبيسب ويلعن – عيل مش متربى – فى كل اللى عملوا ثورة 25 يناير اللى مكتوب فى فصل من 80 صفحة بدون ملحق الصور اللى فى السى دى الملحق بالكتاب وبادرنى قائلا يعنى مكنتوش قادرين تخلصوا الموضوع فى يومين لازم يعنى 18 يوم وبعد كده ايه كل الاجتماعات ده ...رايحين اجتماعات راجعين من اجتماعات..ايه مفيش ايميل ولا سكايب وتنجزوا.

طبعا انا بحاول اكون اب ديموقراطى وبسمح للواد بن الكلب يعبر عن نفسه ده احسن ما يعمل ثورة عليا وهو عارف طريق ميدان التحرير وعارف ميدان القائد ابراهيم وممكن يعمل اعتصام فى المطبخ وده معناه ان مخزون الاكل حيروح على بطنه وانا متمسك بسلطاتى الابوية....واستطرد البيه الصغير وبعدين ازاى فى اول كتاب التاريخ تقولوا ان الرئيس السابق مبارك قائد الضربة الجوية وانه راجل زى الفل وبعدين تيجوا فى الفصل ده تلعنوا الدنيا حواليه...انا مخى حيضرب....يعنى يا والدى الراجل ده كويس ولا لا؟؟؟

وبعدين بحسبة بسيطة حضرتك كان عندك 29 سنة لما الثورة قامت والرئيس السابق قعد 30 سنة...لما هو مش كويس صبرتوا عليه ليه؟؟؟ ثم ان المقرر فيه ال 30 سنة كلهم من اول رفع العلم على طابا وده بيقول ان الراجل اشتغل كويس وبعد كده بيقول ان الخصخصة أضرت بالبلد ايه مفيش حد كان بيفهم فى الاقتصاد ساعتها وبعدين مش حضرتك – ابنى بدأ يبقى مؤدب ويقولى حضرتك – مش قرتنى كتاب جلال امين وحسب كلامك الراجل ده بيفهم ...ليه مكنش وزير؟؟؟ وحضرتك هو احمد زويل لي مبقاش مشرف عام على مدن العلوم والتكولوجيا فى مصر؟؟ بابا بابا انا مبقتش فاهم حاجة ...هيا مصر كانت ماشية بظهرها ليه؟؟؟

حاجة معصبانى جدا بقى ليه بقى كل الناس اللى استشهدت يعنى مكنتوش عارفين تخلصوا من غير ما حد يموت؟؟ مكتوب فى الكتاب يا بابا انكم كنتم بتقولوا سلمية سلمية...طب ليه ضربوا عليكم ناس وهنا اوفقته وقلت له لا احنا اضربنا بالعصيان وبعد كده بالعصيان الكهربا وبعد كده بالغازات المسيلة للدموع وبعدين رصاص مطاطى وبعد كده رصاص حى. واستطرد العفريت اه ه ه ه ه عشان كده مصر انى ادخل ثانوى عسكرى وادخل فنية عسكرية....بابا البنت اللى اسمها سالى الله يرحمها شكلها حلو قوى – ابنى طالع لى بيحب الجمال والحلاوة – وسبحان الله امه اللى هيا مراتى نادت علينا فى الاذاعة الداخلية للفيلا لقد حان الان موعد الغذاء يا بشر.

على الغدا الولد مبطلش كلام عن مقرر التاريخ وسأل مامته : ماما انت كنتى فين فى ثورة 25 يناير؟؟ مراتى بصت لى وقالت له كنت فى الشارع وشفت أبوك هناك وكنت مسحول وانا عمال اغمز لها بلاش ده – بس هيا ولا هنا – وأبوك أخد ضرب لما شبع هو وصحابه وحبيته ساعتها...الواد حبتيه عشان بينضرب؟؟؟ تدخلت هنا وقلت له كل يا حبيبى الاكل برد محاولا الحفاظ على هدوئى.

بعد الغداء الواد برده مصمم انى اقعد احكى له اللى حصل بنفسى والخص له ال80 صفحة بتوع المقرر وبما انى عايزه يبقى مجتهد ويفهم لوحده وبعدين يناقشنى قلت له المقرر بيقول حرية....عدالة...كرامة انسانية.

الى اللقاء فى الجزء الثانى

استدراك:
من سيكتب تاريخ تلك الحقبة؟؟؟ سؤال لابد ان نبحث له عن اجابة
أحمد عصمت

أقول ولا اموت

أعلم تمام العلم ان السطور القادمة قد تكون صادمة لجرأتها وقد يكون لها أثر سلبى على شخصى بس حقولها ورزقى على الله
العلاقة بين الثقافة والصحافة فى – البلالاه- ...هذا هو ملخص الندوة التى حضرتها بالامس بمركز الابداع ..ادارها الناقد عبد الله هاشم وحاضر فيها الاستاذ حزين عمر..الحقيقة انا - مرارتى اتقفعت جدا وجالى عصر هضم - رغم ان الموضوع من الموضوعات التى اهتم بها جدا.

تحدث حزين عن الصفحات الادبية والملاحق الثقافية بما انه - من المفرومين - فى المطبخ الصحفى كما أشار للمنتدى الاعلام الثقافى الاول الذى عقدته دار التحرير لدراسة هذه المشكلة ولكنه لم يطلعنا على ما خرج به هذا المنتدى وأصر على ان من يكتبون صفحات الادب يعتبرون انفسهم الاعلى قيمة والافضل من زملائهم لثقافتهم فنجد من يحررون الفن والحوادث والكرة دائما ملتفين معا فى حين ان من يكتبون الادب منزوون!!!

وقال" نحن الادباء أسسنا هذه المهنة رفاعة رافع الطهطاوى أسس الوقائع المصرية وعلى مبارك ومحمد عبده وأحمد لطفى السيد والعقاد وطه حسين وظل هذه الارتباط الحتمى حتى ما بعد الثورة"

تأسيس دار التحرير ودورها كان من اهم نقاط الحوار وتباهى المحاضر بعمل العظيم يحيى حقى بها ورفضه العمل بالاهرام وقال انه ما قبل الثورة بقليل كان هناك اتجاه للتخلص من الاهرام او طمها لدار الهلال حتى جاء هيكل وطورها...

ثم قام احد الاساتذه وهو من كبار الادباء بالاسكندرية ان لم يكن اكبرهم بالهجوم على اخبار اليوم باعتبار انها مدرسة خبرية اضرت الصحافة المصرية وسطحتها واشاعت حالة من التغييب لدى الشعب وشغلتهم باخبار ام كلثوم وعبد الوهاب...

وتطرق الحديث بطبيعة الحال الى تقلص الصفحات الادبية فى الجرائد وعزوف الناس عن قراءتها وانها تكون اول الضحايا اذا كان هناك اعلان فتلغى المساحة لصالح الاعلان كما تلغى لصالح صفحات الكرة التى تبيع اكثر... وبالطبع ناس شباب الصحفيين من الحب جانب على اعتبار انه سطحى وغير متعلم وجاهل ولا يرغب ابدا فى الانضمام لصفحة الادب لانه مبيعرفش عربى اساسا وقدم قائمة بالشروط التى يجب توافرها فى الصحفى الادبى بها حوالى 7 شروط عشان تكملهم ان شاء تبقى صحفى وانت عندك 50 سنة!!!!

ايضا قال ان المصريون لا يقرأون وشارك احد الحاضرين واحد احد المثقفين ...ان ابنه لا يقرأ ويقضى وقته على الفيس بوك فى الاشياء التافهة... وان امثال بلال فضل اضروا بالادب لرغتهم الضعيفة والسطحية فى التناول

كل هذا وانا أحاول ان امسك لسانى وحاول صديقى – الذى ظلمته معى – محمد عبد الفتاح تهدئتى ولكننى كنت ممتعض....و بما ان البنى ادم طاقة لم استطع التحملو وانفجرت رفعت ايدى زى احسن تلميذ فى اى مدرسة- وفين بقى على ما جه الدور عليا بس المهم انه جه - ووقفت وعرفت نفسى وكان هذا تعليقى:

الحقيقة ان الاستاذ حزين عجبنى جدا لانتماءه لدار التحرير وتحدث عن دورها على مدار التاريخ الصحفى المصرى واشار الى الاسماء اللامعة التى تخرجت فيها وكانت اعمدة الجرائد الاخرى....وهو ما لا غبار عليه. الحاضرون أيضا لم ينكروا ناصريتهم الزائدة وتحدثوا كثيرا عن دور الثورة فى النهضة الثقافية لمصر وهو ما لا انكره فقد كان للثورة ايادى بيضاء من خلال سلسلة الالف كتاب والترجمات ..الخ.

استاذى الغريب ان تتم مهاجمة اخبار اليوم كمدرسة صحفية على الرغم من وجود قامات عالية تخرجت من هذه المدرسة واذا كانت تلك المدرسة قد أضرت بالصحافة فلماذا لم تفقوا امامها من خلال كتاباتكم او ابراز مدرسة الرأى عليها وتثقيل كفتها !!! رغم ايمانى الشديد ان المدرستين معا مطلوب تفعيلها بشكل اكبر.

أما عن ان الشباب يعزفون عن الانضمام لصفحات الادب لجهلهم فالمشكلة مشكلة تعليم منذ الصغر وعلى الرغم من هذا هناك العديد من الشباب يعملون بالنقد الادبى وما يكتبونه مقروء تماما بالشروق والمصرى اليوم وبالطبع هم ليسوا فى قاماتكم العالية تلك التى وصلتم اليها بعد سنوات من الخبرة وهو الطبيعى.

سيدى مشرفو صفحات الادب لم يتغيروا منذ سنوات وانت تقول انه لا احد يقرأ تلك الصفحات وتكون الضحية الاولى للاعلان وهو ما اوافق عليه بشدة فماذا فعلتم لتطوير تلك الصفحات وإبراز اهميتها..الصفحات كما هى منذ سنوات وترتيبها كما هو وكما نقول فى المهنة" ميزنباج" الصفحة ممل جدا!!!

وإن قلنا الشعب لا يقرأ واتفق معك الى حد كبير ولكن ما تفسيرك لمبيعات كتب يوسف زيدان واعتقد ان كتاباته ليست بالسطحية فى عزازيل والاهوت العربى واخيرا النبطى... وكتابات ابراهيم عبد المجيد ومبيعات كتب جلال أمين!!!

الاستاذ الذى قال انه منح نجله ذو السبعة عشر عاما 100 جنيه من اجل ان يقرأ كتابا فردها لها لان الكتاب سخيف " طب هو فين طول ال17 سنة اللى فاتوا..مكنش بيخليه يقرا ليه"؟؟؟

وبالنسبة للفيس بوك حضراتكم المشكلة مش فيه المشكلة فينا لسوء استخدامنا..حضرتك الناس بتحضر دكتوراه فى الاعلام الجديد او السوشيال ميديا واحنا بنلعب فارم فيلا ومافيا...

نقطة اخيرة تناولت فكرة التوزيع من خلال المكتبات وضعف الاقبال عليها...هل رأيتم سيادتكم مكتبات الهئية والاخبار والاهرام وقارنتها بالمكتبات الجديد التى استطاعت فعلا الترويج للمنتج الثقافى!!!

شكراً

تعقيب:
نسيت أقول لكم ان السيد المحاضر من أعضاء اتحاد الكتاب وفيه انتخابات قريبه وموسم بقى وكل سنة وانتم طيبين ولم يخل الحوار من محاولات البعض الحصول على تأييد او الحديث عن كوته لادباء الاقاليم...يعنى بعد ما الناس تحارب من أجل الغاء كلمة الاقاليم فى المؤتمر الاخير ...يريدها أحدهم ان تعود من اجل مقعد...كنت اود ان اقول له ونسميها كوته الادباء ونوسع بقى المكان عشان الناس تعرف تقعد براحتها...