فين رمضان بتاع رمضان
• رمضان مش زى رمضان بتاع زمان لما كنا صغيرين خالص وفوانيس؛ واحنا صغيرين كنا بنبقى صايمين بس كنا بنلعب كتير قوى فى المدرسة عشان نسلى صيامنا بس لما كبرنا وبقينا نروح الشغل بقينا عايزين ننام ومنشتغلش لنفس السبب اللى كنا بنلعب عشانه اللى هوه اننا صايميين!!!
• رمضان مش زى رمضان بتاع زمان لما كنا صغيرين كنا بنروح نصلى مع اهالينا رغم اننا يمكن مكناش بنبقى فاهمين اوى يعنى الفرق بين التهجد والتراويح بس كان فيه فرحة اننا بنصلى وسط المسلمين بس لما كبرنا بقينا بنتحجج عشان مننزلش ورايا مشوار او تعبان النهاردة او الجو الحر!!!
• رمضان مش زى رمضان بتاع زمان لما كنا صغيرين كانت الروح بتبقى حلوة والناس كانت بتبقى ماسكه لسانها بجد عشان صايمة دلوقتى ولنفس السبب الناس مش ماسكة لسانها ولسانها عمال يطول لما بقى اطول من ثعبان الاناكوندا!!!
• رمضان مش زى رمضان بتاع زمان لما كنا صغيرين مكان فيه بوجى وطمطم بجد بس لما كبرنا بقى فيه مسخ لبوجى وطمطم..شىء ملهموش اى ملامح من القيمة القديمة سوى الاسم!!!
• رمضان مش زى رمضان بتاع زمان لما كنا صغيرين كانت عزومات ولمة الاهل فى البيت الكبير وبعد كده فى كل بيت عزومة بس لما كبرنا للاسف بقت العزومات عند بن البلد وحسنى وبلبع والشباب فى زانيللى وروسترى وشامى وراحت من العزومة روحها بقت اكل زى اى اكل عادى فى اى يوم عادى!!!
• رمضان مش زى رمضان بتاع زمان لما كنا صغيرين لان لما العيد يقرب كان الكل يتلم عشان يعمل الكحك والبسكويت والغريبة والقرص وحبيب قلبى اللانكشاير بس دلوقتى بقى كله جاهز من بره عشان مفيش وقت والعضمة كبرت يا بنىوالجيل الجديد من البنات معندهوش فكرة الكحك بيتعمل ازاى وده قد يؤدى الى اندثار الفكرة فى البيوت واقتصارها على الحلوانى ...يا مؤمنين كيلو الكحك بالفسدق بقى ب 70 جنية ...الله يكون فى عون العرسان الجداد!!!
والله بعودة يا رمضان
No comments:
Post a Comment