ع السريع (9)

ع السريع (9)
1. بعد الفشل الذريع لشركة النظافة بالاسكندرية وانكماش عدد صناديق القمامة من صندوق لكل عمارة لصندوق لكل عمارتين لصندوق لكل شارع لصندوق على ناصية كام شارع وبذلك اصبحت اكياس القمامة على كل النواصى وتستطيع ان تستيقظ يوميا على صياح ساكنى الدور الاول مع المارة الذين يلقون بالقمامة؛ تفتق ذهن احد المواطنين الى جلب مجموعة من القلل وملوها بالمياه ووضعها فى نفس مكان القمامة وقام اخر بشراء مجموعة من اصاصيص الزرع ووضعها امام ناصيته.مش عايز اقولكم المنظر بقى حلو قد ايه والناس بقت تتكسف ترمى الزبالة ع الناصية ,رغم النظر الحلو الا ان السؤال مازل قائما فين الصناديق؟؟؟
2. امبارح بالصدفة فتحت التليفزيون وبالصدفة برضة فتحت الاخبار المصرية لقيت فيه اجتماع وزراى موسع مع الرئيس ووزير الصحة بيتكلم عن الاجراءات الاحترازية عشان انفلونزا الخنازير وبيشرح الخطة ووزير التعليم اتكلم والتعليم العالى بردة اتكلم.بس اللى لفت نظرى تعليقات الرئيس واسئلته مثلا حتطعموا مين الاول رد الوزير مسئولى الدولة الذين يسيرون اعمال البلد حتى لا تحدث اضطراب فرد الرئيس لا طعموا الشباب الاول وطلبة المدارس وبعدين سأل سؤال محدد جدا :ما هى الاثار الجانبية للفاكسين؟؟واضاف مش عايزين نطعمهم فيبقى عندنا جيل مشوه فى حته تانية.المهم انا قلت لما ادخل كده على الانترنت اشوف ايه اجراءات الدول التانية وبالذات امريكا وانجلترا والصين لقيت ان نفس الكلام بالنص وحتى التعليمات المرسله للمدارس ..قلت فى عقل بالى لما مسئولى البلد بيخططوا كويس كده امال ايه سبب الكوارث اللى احنا فيها؟؟؟
3. ايه الملل والتكرار اللى فى مسلسلات الاستظراف اللى اسمها سيت كوم ده. احب اوجه لهم رسالة "خف تعوم" ومش عشان مسلسل نجح نعمل له مليون جزء وبعدين تبص على الكتاب تلاقيهم مشتركين بس يقولك لا هما مشتركين اه بس الروح مختلفة.
4. ممكن اسال سؤال بايخ وغلس ومعندهوش دم : ايه اللى بيخلى الستات تركب عربيات الترام المنفصلة بتاعت الرجالة؟؟ مهو مكتوب على العربات عربة السيدات وعربة الرجال. وبعدين لو حصل لا قدر الله وجريت ورا التروماى وملحقتش غير عربة السيدات وركبتها وانت ف نيتك انك تنزل المحطة اللى بعديها وتركب عربة الرجال تصاحبك نظرات الاشمئزاز والاشمئناط وتجد كلمات تتطاير حولك من عينة ناس معندهاش دم او ما تتلم يا راجل وتركب هناك.ممكن حد يفهمنى ايه المنطق فى كده!!!
5. الحمد لله بقى لى اسبوع اه والله سبع ايام بقرا فى الخطبة (المقدمة) فى كتاب تخليص الابريز فى تلخيص باريز. امهات الكتب ده صعبة قوى بس انا سعيد جدا والله المرادفات والاطناب والجناس فى الجمل والكلمات رائع جدا ومثرى للغة فمثلا قال عن العلم:" ان خير الامور العلم ؛ وانه اهم كل مهم وان ثمرته فى الدنيا والاخره على صاحبه تعود ؛ وان فضله فى كل زمان ومكان مشهود". أه نسيت اقولكم ان المقدمة 5 صفحات بس.