أبنى وثورة 25 يناير

أبنى وثورة 25 يناير

تدور الاحداث عام 2028 بالظبط على اعتبار انى حتجوز كمان سنة ولا حاجة وحخلف عيل فرقع لوز حيتولد لابس نظارة من كتر القرايه ان شاء الله واعمل له ليزك لما يبقى عنده 21 سنة.

وبما اننا حنكون فى دنيا كلها توماتيكى توماتيكى فمسكت الريموت عشان ارن على قوضة الواد ابنى عشان ادخل اطمن عليه – شايفين الاب المحترم اللى بيرن على ابنه قبل ما يدخل علي ومش بدخل زى الاعصار عشان اقفشه متلبس بيقرا ومش بيذاكر – لقيت الواد عمال يلف فى القوضة وبيسب ويلعن – عيل مش متربى – فى كل اللى عملوا ثورة 25 يناير اللى مكتوب فى فصل من 80 صفحة بدون ملحق الصور اللى فى السى دى الملحق بالكتاب وبادرنى قائلا يعنى مكنتوش قادرين تخلصوا الموضوع فى يومين لازم يعنى 18 يوم وبعد كده ايه كل الاجتماعات ده ...رايحين اجتماعات راجعين من اجتماعات..ايه مفيش ايميل ولا سكايب وتنجزوا.

طبعا انا بحاول اكون اب ديموقراطى وبسمح للواد بن الكلب يعبر عن نفسه ده احسن ما يعمل ثورة عليا وهو عارف طريق ميدان التحرير وعارف ميدان القائد ابراهيم وممكن يعمل اعتصام فى المطبخ وده معناه ان مخزون الاكل حيروح على بطنه وانا متمسك بسلطاتى الابوية....واستطرد البيه الصغير وبعدين ازاى فى اول كتاب التاريخ تقولوا ان الرئيس السابق مبارك قائد الضربة الجوية وانه راجل زى الفل وبعدين تيجوا فى الفصل ده تلعنوا الدنيا حواليه...انا مخى حيضرب....يعنى يا والدى الراجل ده كويس ولا لا؟؟؟

وبعدين بحسبة بسيطة حضرتك كان عندك 29 سنة لما الثورة قامت والرئيس السابق قعد 30 سنة...لما هو مش كويس صبرتوا عليه ليه؟؟؟ ثم ان المقرر فيه ال 30 سنة كلهم من اول رفع العلم على طابا وده بيقول ان الراجل اشتغل كويس وبعد كده بيقول ان الخصخصة أضرت بالبلد ايه مفيش حد كان بيفهم فى الاقتصاد ساعتها وبعدين مش حضرتك – ابنى بدأ يبقى مؤدب ويقولى حضرتك – مش قرتنى كتاب جلال امين وحسب كلامك الراجل ده بيفهم ...ليه مكنش وزير؟؟؟ وحضرتك هو احمد زويل لي مبقاش مشرف عام على مدن العلوم والتكولوجيا فى مصر؟؟ بابا بابا انا مبقتش فاهم حاجة ...هيا مصر كانت ماشية بظهرها ليه؟؟؟

حاجة معصبانى جدا بقى ليه بقى كل الناس اللى استشهدت يعنى مكنتوش عارفين تخلصوا من غير ما حد يموت؟؟ مكتوب فى الكتاب يا بابا انكم كنتم بتقولوا سلمية سلمية...طب ليه ضربوا عليكم ناس وهنا اوفقته وقلت له لا احنا اضربنا بالعصيان وبعد كده بالعصيان الكهربا وبعد كده بالغازات المسيلة للدموع وبعدين رصاص مطاطى وبعد كده رصاص حى. واستطرد العفريت اه ه ه ه ه عشان كده مصر انى ادخل ثانوى عسكرى وادخل فنية عسكرية....بابا البنت اللى اسمها سالى الله يرحمها شكلها حلو قوى – ابنى طالع لى بيحب الجمال والحلاوة – وسبحان الله امه اللى هيا مراتى نادت علينا فى الاذاعة الداخلية للفيلا لقد حان الان موعد الغذاء يا بشر.

على الغدا الولد مبطلش كلام عن مقرر التاريخ وسأل مامته : ماما انت كنتى فين فى ثورة 25 يناير؟؟ مراتى بصت لى وقالت له كنت فى الشارع وشفت أبوك هناك وكنت مسحول وانا عمال اغمز لها بلاش ده – بس هيا ولا هنا – وأبوك أخد ضرب لما شبع هو وصحابه وحبيته ساعتها...الواد حبتيه عشان بينضرب؟؟؟ تدخلت هنا وقلت له كل يا حبيبى الاكل برد محاولا الحفاظ على هدوئى.

بعد الغداء الواد برده مصمم انى اقعد احكى له اللى حصل بنفسى والخص له ال80 صفحة بتوع المقرر وبما انى عايزه يبقى مجتهد ويفهم لوحده وبعدين يناقشنى قلت له المقرر بيقول حرية....عدالة...كرامة انسانية.

الى اللقاء فى الجزء الثانى

استدراك:
من سيكتب تاريخ تلك الحقبة؟؟؟ سؤال لابد ان نبحث له عن اجابة
أحمد عصمت

أقول ولا اموت

أعلم تمام العلم ان السطور القادمة قد تكون صادمة لجرأتها وقد يكون لها أثر سلبى على شخصى بس حقولها ورزقى على الله
العلاقة بين الثقافة والصحافة فى – البلالاه- ...هذا هو ملخص الندوة التى حضرتها بالامس بمركز الابداع ..ادارها الناقد عبد الله هاشم وحاضر فيها الاستاذ حزين عمر..الحقيقة انا - مرارتى اتقفعت جدا وجالى عصر هضم - رغم ان الموضوع من الموضوعات التى اهتم بها جدا.

تحدث حزين عن الصفحات الادبية والملاحق الثقافية بما انه - من المفرومين - فى المطبخ الصحفى كما أشار للمنتدى الاعلام الثقافى الاول الذى عقدته دار التحرير لدراسة هذه المشكلة ولكنه لم يطلعنا على ما خرج به هذا المنتدى وأصر على ان من يكتبون صفحات الادب يعتبرون انفسهم الاعلى قيمة والافضل من زملائهم لثقافتهم فنجد من يحررون الفن والحوادث والكرة دائما ملتفين معا فى حين ان من يكتبون الادب منزوون!!!

وقال" نحن الادباء أسسنا هذه المهنة رفاعة رافع الطهطاوى أسس الوقائع المصرية وعلى مبارك ومحمد عبده وأحمد لطفى السيد والعقاد وطه حسين وظل هذه الارتباط الحتمى حتى ما بعد الثورة"

تأسيس دار التحرير ودورها كان من اهم نقاط الحوار وتباهى المحاضر بعمل العظيم يحيى حقى بها ورفضه العمل بالاهرام وقال انه ما قبل الثورة بقليل كان هناك اتجاه للتخلص من الاهرام او طمها لدار الهلال حتى جاء هيكل وطورها...

ثم قام احد الاساتذه وهو من كبار الادباء بالاسكندرية ان لم يكن اكبرهم بالهجوم على اخبار اليوم باعتبار انها مدرسة خبرية اضرت الصحافة المصرية وسطحتها واشاعت حالة من التغييب لدى الشعب وشغلتهم باخبار ام كلثوم وعبد الوهاب...

وتطرق الحديث بطبيعة الحال الى تقلص الصفحات الادبية فى الجرائد وعزوف الناس عن قراءتها وانها تكون اول الضحايا اذا كان هناك اعلان فتلغى المساحة لصالح الاعلان كما تلغى لصالح صفحات الكرة التى تبيع اكثر... وبالطبع ناس شباب الصحفيين من الحب جانب على اعتبار انه سطحى وغير متعلم وجاهل ولا يرغب ابدا فى الانضمام لصفحة الادب لانه مبيعرفش عربى اساسا وقدم قائمة بالشروط التى يجب توافرها فى الصحفى الادبى بها حوالى 7 شروط عشان تكملهم ان شاء تبقى صحفى وانت عندك 50 سنة!!!!

ايضا قال ان المصريون لا يقرأون وشارك احد الحاضرين واحد احد المثقفين ...ان ابنه لا يقرأ ويقضى وقته على الفيس بوك فى الاشياء التافهة... وان امثال بلال فضل اضروا بالادب لرغتهم الضعيفة والسطحية فى التناول

كل هذا وانا أحاول ان امسك لسانى وحاول صديقى – الذى ظلمته معى – محمد عبد الفتاح تهدئتى ولكننى كنت ممتعض....و بما ان البنى ادم طاقة لم استطع التحملو وانفجرت رفعت ايدى زى احسن تلميذ فى اى مدرسة- وفين بقى على ما جه الدور عليا بس المهم انه جه - ووقفت وعرفت نفسى وكان هذا تعليقى:

الحقيقة ان الاستاذ حزين عجبنى جدا لانتماءه لدار التحرير وتحدث عن دورها على مدار التاريخ الصحفى المصرى واشار الى الاسماء اللامعة التى تخرجت فيها وكانت اعمدة الجرائد الاخرى....وهو ما لا غبار عليه. الحاضرون أيضا لم ينكروا ناصريتهم الزائدة وتحدثوا كثيرا عن دور الثورة فى النهضة الثقافية لمصر وهو ما لا انكره فقد كان للثورة ايادى بيضاء من خلال سلسلة الالف كتاب والترجمات ..الخ.

استاذى الغريب ان تتم مهاجمة اخبار اليوم كمدرسة صحفية على الرغم من وجود قامات عالية تخرجت من هذه المدرسة واذا كانت تلك المدرسة قد أضرت بالصحافة فلماذا لم تفقوا امامها من خلال كتاباتكم او ابراز مدرسة الرأى عليها وتثقيل كفتها !!! رغم ايمانى الشديد ان المدرستين معا مطلوب تفعيلها بشكل اكبر.

أما عن ان الشباب يعزفون عن الانضمام لصفحات الادب لجهلهم فالمشكلة مشكلة تعليم منذ الصغر وعلى الرغم من هذا هناك العديد من الشباب يعملون بالنقد الادبى وما يكتبونه مقروء تماما بالشروق والمصرى اليوم وبالطبع هم ليسوا فى قاماتكم العالية تلك التى وصلتم اليها بعد سنوات من الخبرة وهو الطبيعى.

سيدى مشرفو صفحات الادب لم يتغيروا منذ سنوات وانت تقول انه لا احد يقرأ تلك الصفحات وتكون الضحية الاولى للاعلان وهو ما اوافق عليه بشدة فماذا فعلتم لتطوير تلك الصفحات وإبراز اهميتها..الصفحات كما هى منذ سنوات وترتيبها كما هو وكما نقول فى المهنة" ميزنباج" الصفحة ممل جدا!!!

وإن قلنا الشعب لا يقرأ واتفق معك الى حد كبير ولكن ما تفسيرك لمبيعات كتب يوسف زيدان واعتقد ان كتاباته ليست بالسطحية فى عزازيل والاهوت العربى واخيرا النبطى... وكتابات ابراهيم عبد المجيد ومبيعات كتب جلال أمين!!!

الاستاذ الذى قال انه منح نجله ذو السبعة عشر عاما 100 جنيه من اجل ان يقرأ كتابا فردها لها لان الكتاب سخيف " طب هو فين طول ال17 سنة اللى فاتوا..مكنش بيخليه يقرا ليه"؟؟؟

وبالنسبة للفيس بوك حضراتكم المشكلة مش فيه المشكلة فينا لسوء استخدامنا..حضرتك الناس بتحضر دكتوراه فى الاعلام الجديد او السوشيال ميديا واحنا بنلعب فارم فيلا ومافيا...

نقطة اخيرة تناولت فكرة التوزيع من خلال المكتبات وضعف الاقبال عليها...هل رأيتم سيادتكم مكتبات الهئية والاخبار والاهرام وقارنتها بالمكتبات الجديد التى استطاعت فعلا الترويج للمنتج الثقافى!!!

شكراً

تعقيب:
نسيت أقول لكم ان السيد المحاضر من أعضاء اتحاد الكتاب وفيه انتخابات قريبه وموسم بقى وكل سنة وانتم طيبين ولم يخل الحوار من محاولات البعض الحصول على تأييد او الحديث عن كوته لادباء الاقاليم...يعنى بعد ما الناس تحارب من أجل الغاء كلمة الاقاليم فى المؤتمر الاخير ...يريدها أحدهم ان تعود من اجل مقعد...كنت اود ان اقول له ونسميها كوته الادباء ونوسع بقى المكان عشان الناس تعرف تقعد براحتها...

ع السريع 13

ع السريع 13

1 - مش قادر مش ملاحق على الاخبار المستفزة التى يتحفنا بها من يعيشون تحت سماء هذا الوطن وفوق أرضه.... انا من البلد ده ...اه والنعمة انا من النواحى ده...بس عمرى ما سمعت عن سرقة مئذنة أثرية من مسجد السلطان حسن الشهير!!! أنا مش حتكلم عن الحلال والحرام هنا لكن اللى مش داخل مخى يعنى ايه منبر يتسرق؟؟؟ايوه المنبر الطويل اللى كل الناس بتشوفه وهى داخله وهيا خارجه...منبر يا ناس!!! منبر يا خلق!!!

2 -الاسماء الغريبة التى اتحفنا بها وزير التربية والتعليم لمدارس النصر بنين والنصر بنات وليسيه الحرية بقت مدرسة المستقبل للبنات - مدرسة الجيل الصاعد - ليسيه الجديدة!!! يعنى انا ممكن اقوم الصبح الاقى قرار بكره ان اى حد فينا يبقى اسمه سوسن او نهى او مفيدة او تفيدة او الجحش او العبيط او الدهل؟؟؟ وهل يا ترى اضافة كلمة المستقبل او الجديدة هو اللى حيوصلنا للتعليم المتميز اللى احنا عايزينه!!!

3 - السيدة الفاضلة ( وانا بجز على سنانى) وزيرة القوى العاملة قدمت دعوة صريحة ايه بقى خير اللهم اجعله خير لخريجى الكليات النظرية كالآداب والحقوق للعمل كـ "أفراد أمن" بالمولات التجارية، لأن "هذا هو المتاح "
وبكده نفهم ان فيه تنسيق بين الوزارة ورجال الاعمال وبرده نفهم ان حيبقى فى زيادة فى عدد المولات وحتوصل لحوالى 100000 مول عشان تلم كل الخرجين!!!

4 - تصريح للسيد الوزير المغربى تعليقا على ان مواسير الاسبستوس البلاستيكية مسرطنة، قال سيادته ان مرور المياه فيها لا يؤثر نهائيا على حياة الإنسان، فقط تؤثر على عمال التقطيع والتركيب…. ده على اعتبار ان العمال دول مش مصريين يعنى ولا ايه!!!

بلبل حيران...فيلم فى الحمادة

بلبل حيران...فيلم فى الحمادة

من المتوقع ان تنتشر كلمة "فى الحمادة" خلال الايام القليلة المقبلة وتكون البديل لجامد طحن وروش اخر حاجة وفاتك كتير كيك فيقال جامد حمادة وروش حمادة وفاتك كتير حمادة....وجرى العرف ان يكون الحمادة هو النيكنيم او بالعربى اسم الدلع لاى حد فى مصر اسمه احمد او محمد واحيانا يستخدم لما فجاة تلاقى نفسك نسيت اسم اللى واقف قدامك.

خالد دياب مؤلف فيلم بلبل حيران قرر ان تجرى كلمة حمادة على لسان زينة طول الفيلم لتكون هي التيمة التى تستخدمها...كما اخترع المؤلف تخصص طبى جديد مش موجود اساسا فى كليات الطب لايمى سمير غانم الدكتور امل وهو تخصص العظام والعلاج الطبيعى.

وبغض النظر عن الجملة السابقة فإن الفيلم له فكرة رائعة ومؤثرة وواقعية جدا....البحث عن العروسة السوبر والعريس السوبر من خلال نبيل او بلبل مهندس الصوت الذى يخطب فتاة ثم يصادف اخرى يرى انها الانسب له فيترك الاولى ويخطب الثانية ثم فجأة يفقد الذاكرة وينسى الاثنتان ويتفقان عليه حتى تقع له حادثة ويذهبان به للمستشفى حيث صديقتهما الثالثة التى تعتنى به وتمرضه – مش عارف دكتورة ايه اللى بتغسل سنان المرضى بتوعها وبتلف لهم السجائر- حتى تكشف له الاخيرة عن الحكاية كلها...فعلا ان كيدهن عظيم.

الفيلم يضرب على وتر مزعج ويعالج قضية يعانى منها الكثير والكثير من الشباب المصرى وربما العربى أيضاً وهو التطلع او الطمع فى الحصول على كل شىء مرة واحدة....هو عايزها حلوة ونغشة ومؤدبة وربة منزل وذكية وبتسمع الكلام وان تكون محبوبة وقيادية ولها شله وشيك ومتحركة ومتحررة وبتعرف تطبخ وتربى العيال...هى تريده غنى ومتحرك وعيلته كبيره وعنده عربية وفيلا فى الساحل ويسفرها بره ولديه وظيفه محترمة ومش حرامى ومامته سيدة مجتمع واخته مش منفسنه وعايزه تسكن فى شقة من أقل من 150 متر وفرحها لازم يبقى فى فندق 50 نجمة ومفيش حاجة تتعمل أقل من بنت خالتها عشان هيا مش أحسن منها.

تدور الدائرة ونجد اننا نسير فى تلك الحلقة المفرغة التى لا تنتهى وهو ما ينطبق عليه ما قاله بلبل " القطار أسرع ام النخلة اطول" والاجابة هنا لا هي طبيعية ولا منطقية الا وهى " ان البحر اوسع" مهى بالظبط ايه اللى جاب القلعة جبن البحر؟؟؟ فكرة المقارنة غير مطروحة وان تحصل على كل شىء فى شخص واحد مش موجود لان الكمال مش موجود فى الدنيا والكمال لله وحده.

أستطيع ان اعدد هنا مجموعة من الاصدقاء الذين يفكرون بطريقة بلبل وايضا عدد لا حصر له من الفتيات يفكرن بنفس الطريقة وهو ما ادى الى ارتفاع سن الزواج فى مصر ولكن محدش بيستدعى الجملة اللى بنسمعها من واحنا اطفال " الحلو ميكملش".

كى تجد العريس السوبر يجب ان تكون انت العروسة السوبر وكى تجد العروسة السوبر يجب ان تكون انت العريس السوبر وبما ان مفيش لا سوبر مان ولا سوبر وومن ولا سوبر فاميلى الا فى الافلام يبقى مفيش غير الرضاء بالاسمه والنصيب والايمان باننا لن نتحصل الا على ما كتبه الله والمكتوب على الجبين حتشوفه يعنى حتشوفه العين.

واخيرا عايزة عروسة سوبر اشترى باربى وعايزة عريس سوبر اشترى رجل المستحيل.

من قفشات الفيلم:
* البنت بتقول لبلبل: بتحب الصدر ولا الورك وطبعا كان قصدها على الفراخ...رد بلبل وقالها الرجالة بتحب كل حاجة.
* قال بلبل:احكى لى وانت ساكت زى بالظبط أمشى وانت واقف.
* اتفضلى استحمرى واسألى.
* بلبل مبلول...بلبل مبلول.

29 لوحة للقدوة والحوار

29 لوحة للقدوة والحوار
"تسعة وعشرون لوحة زيتية ممزوجة ببعض المنحوتات أحاول من خلالها إعادة تقديم مفهوم القدوة بعد ان اصبحت هاجساً يمثل إشكالية للكثيرين؛ ولم أجد خيراً من سيدنا محمد عليه الصلاة والسلام كى أقدم سيرته الشريفة بادئاً بعام الفيل" هكذا استهل الفنان الدكتور طاهر عبد العظيم حواره لجريدة الاسكندرية عن معرضه " رؤية تشكيلية للسيرة النبوية" المقام فى مجمع متاحف محمود سعيد.

................................؟
الفكرة نابعة من ارتباط الفن التشكيلى بالحضارة الاسلامية على مر العصور واسلوب الفنان المسلم فى عملية تجميع واختيار ومزج الاشكال الفنية المختلفة التى تعرض لها من خلال الفتوحات الاسلامية ثم ما تبع ذلك من غزارة الانتاج الفنى الاسلامى وكذلك العمارة الاسلامية.

...............................؟
بداية الاعداد للمعرض جاءت من خلال الدراسة المتعمقة والتى اكتشفت من خلالها صعوبة الحصول على مراجع وافية لهذه الفترة التاريخية الهامة من ناحية الازياء او العمارة مما جعل العمل يعتمد بالأساس على الخيال لتصور الأحداث. وأثناء عملية البحث الدقيقة هالنى ما اكتشفته من مغالطات كبيرة جدا في الدراما التي تعرضت لهذه الحقبة التاريخية، حتى ان فيلم الرسالة للمخرج الراحل مصطفى العقاد على سبيل المثال صورالبيوت بشكل غير مطابق للواقع، حيث وجد بعضها ذا ثلاث أدوار ولم يكن ذلك موجوداً فى ذلك الوقت. ثم توجهت بعد ذلك لدار الإفتاء متمثلة في فضيلة مفتي الديار المصرية الأستاذ الدكتور/ علي جمعة، وذلك لمراجعة الأحداث التاريخية والضوابط الشرعية التي يقوم عليها العمل، وتابع العمل بشكل شخصي، كما قام فضيلته بتعيين الدكتور/ أشرف فهمي كمتخصص في السيرة النبوية ليكون مرجعية للعمل طوال الوقت، مثل تسلسل الأحداث ومفردات تفاصيلها من الناحية التاريخية والشرعية.

..............................؟
بالطبع تأثرت عندما علمت بالرسوم المسيئة ومحاولة تشويه صورة الرسول (صلى الله عليه وسلم)، انفعلت بالموضوع كفنان مسلم ، لم تستطع العولمة وما يقال عن الفضاء الإنساني الذى يعمل فيه الفنان ـ أن تجعلنى أغض الطرف عن المسألة أو اعتبرها من قبيل حرية التعبير، ومن المؤسف أن هناك من سارع إلى وصف حضارتنا الإسلامية بأنها حضارة متخلفة أمام الحضارة الغربية المتقدمة؛ ليجهض بذلك أي دعوات إلى الحوار بين الحضارتين، إلا اذا كان يقصد بالحوار الهيمنة والغزو الثقافي لا التفاعل الذي هو عبارة عن حوار بين ثقافتين على أرض واحدة. وأهم ما في هذا الحوار أن يكون متكافئاً من حيث التأثير والتأثر بحيث لا يستبيح أحدهما الآخر أو يجور عليه‏..‏

.............................؟
تاريخنا يشهد لنا بأننا دائما كنا سباقين إلى التفاعل والحوار، ولعل النموذج الواضح في التاريخ هو فتره الحكم الإسلامي للأندلس، وذلك التأثير الذي شهدته دول أوروبا من تنوير بفعل الثقافه العربية الإسلاميه ‏.
أما بالنسبة لأصحاب الدعوة للحوار بين الحضارات ؛ هل هناك طريقة أكثر تحضراً من الحوار بلغة مشتركة وهي لغة الفن ؟! فلم يكن هناك أبلغ من إلقاء الضوء على سيرة النبي الذي حاولوا الإساءة إليه ، النبي محمد الذي حمل شعلة التنوير في أكثر العصور إظلاماً، ورفع راية الحوار، ونبذ التعصب فى أكثر أوقات التاريخ تطرفاً وعنصرية!

..............................؟
بالطبع من اهداف هذا المعرض التأكيد على عدم إنكار الإسلام الفنون الراقية ودورها فى المجتمع و إثبات أن الدين الإسلامى لايتعارض مع الفنون بشكل عام وخاصة الفن التشكيلى فى أطار الضوابط الشرعية لإسلوب التعبير وذلك دون التأثير على قيمة العمل الفنى وجوانبة الإبداعية التى تعبر عن المضمون المطلوب التعريف به.

..............................؟
المعرض عبارة عن 29 لوحة زيتية منفذة على خشب ، تمثل رؤية فنية تشكيلية بانورامية لمراحل من سيرة سيدنا محمد (صلى الله عليه وسلم) منها 8 يكونون لوحة واحدة بطول 16 متراً في عمل متصل منفصل ومتسلسل، طبقاً لسير الأحداث ، حيث تبدأ اللوحة بعام الفيل وجيش أبرهة ، ثم هلاكهم بواسطة الطير الأبابيل ، التي تحمل حجارة من "سجيل" ، مروراً بحال مكة في هذا الوقت والأشكال المختلفة من العقائد والعبادات ، والتي سادت فيها الأصنام . في نفس العام كان ميلاد الرسول صلى الله عليه و سلم. يلي ذلك الإشارة إلى المعجزات ونقاط التحول الأساسية في حياة الرسول (صلى الله عليه وسلم) قبل البعثة، كمعجزة شق الصدر في سن الخامسة، وحادثة نقل الحجر الأسود، ثم نزول الوحي ؛ بالإضافة إلي الإستفادة من العمل كأساس لأعمال فنية مختلفة الوسائط كأعمال النحت البارز والنحت المجسم وتوظيف الصوت والضوء وكذلك عمل فيديو قصير مبني على هذه الاعمال للتاكيد علي فكرة تناول الموضوعات الهامة بأسلوب عصري جذاب مواكب لأساليب العرض الحديثة .

بنكك فى جيبك....دليل جديد للبنوك بالاسكندرية

بنكك فى جيبك....دليل جديد للبنوك بالاسكندرية

بمناسبة اختيار الاسكندرية عاصمة للسياحة العربية لعام 2010 صدر "دليل البنوك وماكينات الصرف الالى" لمحافظة الاسكندرية والبحيرة ومطروح وهو بمثابة قيمة إضافية لدعم الاقتصاد والسياحة والتجارة بتلك المحافظات.

يشمل "دليل البنوك وماكينات الصرف الالى" على بيانات 38 بنكاً عاملاً فى مصر بدأ من البنك الاهلى وبنك مصر وبنك الاسكندرية والمؤسسة العربية المصرفية والتجارى الدولى والبركة وبيريوس والبنك العربى الافريقى الدولى...كذلك أحدث البنوك التى أنشأت فروع لها بالاسكندرية كبنك عودة والمشرق والاهلى اليونانى...الخ.

تتكون البيانات المدرجة من أرقام التليفونات والفاكسات والتلكسات والبريد الاليكترونى وعناوين المراكز الرئيسية والفروع بالاضافة للخدمات البنكية التى تقدمها هيئة البريد المصرى بالمحافظات. والجديد فى "دليل البنوك وماكينات الصرف الالى" احتوائه على الارقام المباشرة بمديرى ونواب الفروع بهدف تسهيل الاتصال بهم للحصول على الخدمات.

كذلك الدليل يقدم جميع بيانات البنك المركزى بالقاهرة ومختلف إداراته بالاسكندرية وأيضاُ نبذة مختصرة عن دورة فى الاقتصاد الوطنى المصرى منذ ان تم انشاءه عام 1961 .

يرسم الدليل خريطة واضحة لاماكن ماكينات الصرف الالى والتى تمكن من سحب وايداع الاموال وكذلك كافة هذه الماكينات تعمل بنظام 123 حيث يمكن السحب والايداع منها لكافة البنوك المشتركة فى هذه الخدمة
.كما يكشف الدليل عن مواقع تجمعات فروع البنوك المختلفة والتى تتمركز فى بعض مناطق وسط البلد وسموحة وطريق الحرية وجليم وباتريس لومومبا ولوران وزيزينيا والاسواق التجارية مثل سيتى سنتر وسا ستيفانو مول والداون تاون وبرج العرب وعلى امتداد الكورنيش ومحافظتى البحيرة ومطروح.


كما يقدم الدليل مجموعة من المعلومات المبسطة عن البنوك فى مصروكذلك بعض التعريفات لبعض المصطلحات البنكية كالفرق بين الحساب العادى والحساب المشترك وإيصالات الايداع والفائدة البسيطة والمركبة والحساب الجارى وحساب التوفير والاوراق التجارية التى تتعامل عليها البنوك وتظهير الشيكات والتى تفيد المستخدم العادى فى تعاملاته البنكيه.

الجدير بالذكران الطبعة الاولى من الدليل توزع مجانا للافراد من خلال البنوك المشاركة كما تم توزيعه على كافة الجهات الرسمية والشركات والفنادق وشركات السياحة والعرف التجارية وغرفة الفنادق وغرفة المنشآت الساحية وغرفة الملاحة والشركات المختلفة.

أنت جيت – شهقة - يا رمضان

أنت جيت – شهقة - يا رمضان

كشاب يطاردنى هذا السؤال من اسبوع تقريبا من مجموعة من الاصدقاء و الصديقات...هو انت ناوى تنزل البحر فى رمضان؟؟ طب ناوى تطلع الساحل؟؟ طب رمضانك حيبقى عامل ايه السنة ده؟؟

الحقيقة كنت مستغرب من السؤال لأن وانا صغير والدى علمنى ان رب رمضان هو رب باقى الشهور والمفترض ان اللى بنعمله فى رمضان بنعمله فى باقى الشهور طبعا مع شوية تحابيش ومكسرات وكنافة وقطايف.

بمعنى ان اللى بيصلى بيصلى واللى بيتقرب من ربنا بيتقرب من ربنا؛ صحيح رمضان فرصة نقرب من ربنا أكتر ونصلى التراويح والتهجد وفرصة عظيمة للتزاور والاحساس بالاخرين لكن على حد علمى مفيش مانع من الاستمتاع بحياتنا فى رمضان!!!

يعنى ايه المانع انك تصلى وتصوم وانت مستمتع باللى انت بتعمله وايه المانع ان تنزل البحر ولا البيسين بعد الفطار يا سيدى عشان متشربش ميه...ببساطة وبوضوح فكرة التدين الظاهرى ورايح فين رايح الجامع وجاى منين كنت فى الجامع والعبايات اللى بنات مصر بتلبسها لن تؤدى الا لمزيد من المظاهر الخارجية الخادعة واللى لا تودى ولا تجيب.