Monday, March 27, 2017

قواعد التقدم للفعاليات الاربعون

ازاى تقدم على مؤتمر او تشارك فى فاعلية:

من منطلق احساسى بالمسئولية العميقة وبسبب ضميرى اللى بيعذبنى كل ما يضمونى للجنة اختيار مشاركين فى نشاط او فعالية او مؤتمر او سفر .... وعشان بيطلع عين اللى خلفونى عشان اقدر احكم على الاشخاص من خلال شوية ورق مقدمينه ...اعرفوا ان كل الفعاليات والانشطة المحترمة بيبقى ليها استمارة طويلة وممكن يطلب منك فى مرحلة لاحقه انك تكتب statement of purpose وممكن بعد كده يعملوا لك سكايب انترفيو... ده مش تعجيز لكن ده لضمان مستوى معين من المشاركين... والى مجموعة من النقاط الهامة:

1-      اقرا كويس النشاط او المؤتمر او الفعالية بتتكلم عن ايه او السفرية عشان ايه....افهم انت بتقدم على ايه.
2-      اعرف اذا كان النشاط بيقدم منح كلية او جزئية وافهم انت عليك ايه وهما عليهم ايه ولا حتغطى نفسك بالكامل....محدش لاقى فلوس اساسا.
3-      اعرف امكانياتك كويس واذا كنت مناسب للحضور ام لا... قلبها فى دماغك شوية كده.
4-      تأكد من اهدافك الحقيقة من المشاركة.... الفسح ممكن تبقى على حسابك.
5-      اعرف ان معظم منظمو الفعاليات بقى عندهم data base وبيبقوا عارفين مين الناس اللى بتقدم وخلاص ومين الناس اللى بتقدم لمجرد التقديم ومين الناس اللى بتقدم عشان تكتب بس انها شاركت فى كذا وكذا وكذا. زمن ان صحابى حيظبتونى عدى وفات.
6-      اعرف ان الموارد المالية بقت قليلة جدا وعليه فان الاختيار بيبقى ع الفرازة وع البيكو....تانى مفيش فلوس فى السوق.
7-      ابوس ايدك اقرا شروط التقديم كويس جدا.
8-      لما يطلبوا منك 5 او 6 حاجات فى شروط التقديم ابعتهم كلهم مرة واحده فى ايميل واحد مش فى 6 ايميلات عشان اللى بيشتغلوا مش حيلموا من وراك ويجمعوا المكعبات...كده انت بتشلهم.
9-      طلبات الاشتراك مش هدفها التعجيز ولكن هدفها الحقيقى التعرف عن قرب على المتقدمين....اكتب حتى اراك.
10-  لو قدمت على فعالية واشتركت فيها سنة متقدمش السنة اللى بعدها الا لو متأكد ان عندك جديد تقدمه.
11-  لو بتقدم كمشارك خلى الابليكيشن بتاعتك تفهمهم انك فاهم وده يرجعنا للنقطة رقم (1).
12-  اقرا شروط التقديم كويس جدا.
13-  لو بتقدم بروبوزال لفكرة جلسة او ورشة عمل فحاول توضح للناس انك متمكن من الموضوع.
14-  لو المشروع فيه اكتر من شريك متبعتش لكل شريك على حده عشان ده بيقلل فرصك مش بيزودها لان بيتم التعامل معاك ك  spammer .
15-  لو قدمت كذا مرة ومتقبلتش لا تيأس وحاول تسأل الناس ليه او فين الغلط وحاول تكتب ده بشكل لطيف عشان تعرف وجهة نظرهم.
16-  أعرف ان عدد المتقدمين بيكون كبير عادة وعليه فترفقوا بمجموعات العمل.
17-  اقرا شروط التقديم كويس جدا.
18-  فيه نظامين للرد على الناس ...الاول ان الرد بيكون على المشاركين فقط بسبب ضخامة العدد مع كتابة اعتذار عام للباقيين باستخدام وسائل التواصل الاجتماعى...والنظام التانى ان يكون الرد على الكل وده بياخد وقت ومجهود كبيرين.
19-  لو تعرف حد بشكل شخصى من ضمن فريق المنظمين مفيش داعى انك تفضل تزن عليه مليون مره فى اليوم عشان ده بيزهقه وبتخسره كصديق.
20-  لو محصلش نصيب انك تشارك مفيش اى داعى انك تقعد تهلل وتشتم فيهم لان ده مش حيضيف او يغير من وضعك ...ممكن تسجل اعتراضك بايميل رسمى.
21-  فكرة انك تغلس بقى على المنظمين وتكتب ضدهم لو بدون سبب حقيقى فده اسمه harassment  
22-  اقرا شروط التقديم كويس جدا.
23-  لازم تعرفوا ان الضغوط اللى بيكون فيها فرق العمل خصوصا فى المنطقة العربية مهولة لان التنسيق بيتم مع عشرتلاف خمسوميه خمسة وستين جهة عشان بس جنابك تتحرك من مكانك لحد ما توصل عندهم.
24-  مفيش داعى للدلع الزيادة او ما يطلق عليه "الدلع المرء" يعنى عايز حد يشيلنى للفندق ويدلعنى لحد القاعة ويفسحنى بالليل وعايز قوضة بشباك بحرى فى الدور الخمسة وعشرين لان الفندق اساسا عشرين دور بس.
25-  لاحظ ان فيه غيرك كتير بيشاركوا وعليه لو كل واحد فيكم قال بس صباح الخير فاليوم خلص.
26-  لما يتكتب لك النصيب وتشارك ...التزم... ابوس ايدك التزم ...محدش صغير ...الالتزام جميل والله ولطيف وبيقلل معدلات الاحتكاك.
27-  اقرا شروط التقديم كويس جدا.
28-  لازم تعرف انك مش مشارك عشان تتفسح ...انت مشارك عشان تفيد وتستفيد.
29-  لما توصل ابتسم فى وش الناس وفى وش بتوع الفندق واللى بيشيل لك الشنطة ...اذا كنت انت تعبان من السفر فهما كمان تعبانيين فى شغلهم.
30-  لما بيكون فيه information desk or help desk فده عشان يساعدك لكن ده مش معناه انك تنقل مقر اقامتك عندهم لانهم مش baby setters .
31-  لو عندك مشكلة بص على كتيب التعليمات واعرف حتكلم مين ...لكن متكلمش كل الفريق على اعتبار ان حيزود فرصتك فى الوصول لهدفك.
32-  اقرا شروط التقديم كويس جدا.
33-  اتعامل مع الناس باحترام عشان يبادلوك نفس الاسلوب.
34-  عادة تغطية المشاركين بالاقامة فى الفنادق لا تتضمن المينى بار فعشان خاطري لو اخدت حاجة ابقى حاسب عليها.
35-  اشكر الناس وانت ماشى.
36-  ابعت لهم ايميل شيك عشان تسيب ذكرى مميزه.
37-  اقرا شروط التقديم كويس جدا.
38-   التزم بجدول الفعاليات ... وممكن تبقى تروح الجيم والساونا والجاكوزى بعد مواعيد الشغل.
39-  شارك وتفاعل على اد ما تقدر فى الفعاليات.
40-  اقرا شروط التقديم كويس جدا.



No comments:

Post a Comment