التاريخ وكيف نعيده للشباب

التاريخ وكيف نعيده للشباب

اكتشفت امبارح ان ثورة يوليو 52 كانت سنة 1919.
وان سعد زغلول عمل الثورة سنة 1918.
وان عرابى مكنش قائد وانه حفيد محمد على .

كانت ده الاجابات اللى حصلت عليها امبارح فى حوارى مع مجموعة من خريجى المدرسة الالمانى ومدرسة أى جى ومدرسة حكومية عادية. الغريب انهم كلهم اتقفوا على حاجة واحدة هو حضور حفلة ميتل وهيد بانجينج وكده يعنى.

وعلا طول افتكرت فيلم الناظر لما قاله مين اللى عمل ثورة 1919 قاله معرفش قاله اسمك ايه قاله سعد زغلول قاله مفيش فايدة .

الحقيقة انى صعقت واتنرفزت واتنفخت وحسيت بالدنيا بتلف بيا خاصة وان واحدة منهم المفترض انها من القيادات الشابة اللى بتسافر تمثل مصر برة. انا مسكت نفسى وسألتهم عن التاريخ اللى بيدرسوه وقال لى بتاع الاى جى انهم بياخدوا تاريخ الحرب العالمية التانية والاولى وتاريخ امريكا والعالم وتاريخ مصر مادة منفصلة اختيارية والبنت بتاعة المدرسة الالمانية مركزة على اللغات اما بقى بتاع الحكومة فده رد عليا رد كنت ناوى اطلع زمارة رقبته فى ايدى قال ايه " انا علمى مش ادبى ".

عارف اننا اتكلمنا قبل كده عن موضوع التاريخ وان الشباب بيتعامل معاه على انه شىء مش اساسى على اعتبار انه حيدخل علمى علوم او رياضة رغم ان المفروض ان الشباب وهما صغيرين يتعلموا التاريخ عشان لازم يتعلموا التاريخ بتاع البلد لان ده واحد من اسلحة الشباب.

التاريخ لازم يبقى اجبارى على كل السنين لغاية الثانوية العامة مع الدين ويبقوا فى المجموع عشان دول من حوائط الصد ضد الغزوات والحروب التى تستخدم فيها القوة الناعمة بديلا للقوة العسكرية.انا هنا مش قصدى اننا حنحارب ولكن قصدى اننا لازم نبقى جاهزين.

عندى شوية اقتراحات عشان نرجع التاريخ والدين تانى للناس وممكن تعتبروا اللى حقوله ده شىء لازم يجتمع عليه المجتمع كله ومنظمات المجتمع المدنى والشركات كمان:
1. انتشرت فى الفترة الاخيرة المراكز المحترمة اللى بتدرس لغة عربية للاجانب المقيمين فى مصر فلماذا لا يتم وضع برامج خاصة بتدريس او تعليم التاريخ للشباب كمدارس صيفية خلال اشهر الاجازات.
2. لابد من تجديد الافلام الوطنية والتى تروى الخبرات التى مر بها الوطن – ولا اقصد بذلك الافلام التسجيلية - وانتاج افلام جديدة بما يتناسب مع متطلبات العصر على ان تروى التاريخ المصرى للشباب من خلال حبكة درامية وقصة محترفة.
3. انتاج اغنيات وطنية بجد تعيدنا لعصر الاغنيات المحترمة مش زى شهامة ومجدعة ولا زى اغانى الاخوة اللى هربوا من الجيش واتسجنوا.مش عارف ليه محدش سأل ليه نفسه احنا ليه بتقشعر ابدانا لما بنسمع اغانى الجيش وبسم الله الله اكبر وسمينا وعدينا ووطنى حبيبى.معتقدش ان عندنا مشكلة انتاج او مشكلة مطربين محترمين وياريت تتجمع الاغاتى ده كلها فى كتاب صغير او حتى على منتدى من منتديات الانترنت.
4. بالنسبة للدين لازم ترجع الكتاتيب تانى ولازم مدارس الاحاد تقوم بدورها وقصدى بالكتاتيب الكتاب القديم بتاع زمان مش الجديد بتاع دلوقتى اللى يكون فيه شيخ ازهرى معمم شديد يعلم الشباب بجد. ممكن حد يتفزلك ويقولى انت عايز ترجعنا لورا وتدعم الفتنة الطائفية ارد عليه واقول له مهو زمان ومش زمان قوى يعنى كان ده موجود وده موجود ومكنش فيه مشاكل وكل واحد على دينه الله يعينه.
5. بالنسبة لمنظمات المجتمع المدنى ومراكز الشباب ممكن تتعمل مسابقات ابحاث ومسابقات ادبية وشعر وما الى ذلك بموضوعات تدعم الحفاظ على الهوية والتاريخ لان مش معنى اننا فى عصر العولمة ان هويتنا تتمسح او تتمسخ.
6. لابد ان يقوم المنزل بدوره فى تعميق روح الوطنية والانتماء داخل افراد الاسرة ولو سمحتوا محدش يكلمنى عن مادة التربية الوطنية بتاعة المدارس اللى مفتكرش انى فيه حد بيقرا الكتاب بتاعها.
7. اعتقد ان تاريخ البلد يماثل فى الاهتمام حقوق الانسان اللى اتعمل لها مقرر وكتب على طلبة الجامعة فى كل الكليات وامتحانات.

اللى عايز اضيفه ان فيه ناس بتتكلم عن سلبيات الثورة وايجابياتها وعلى الجانب الاخر فيه ناس متعرفش ايه هيا مبادىء الثورة اصلاً وحركة عرابى والانفتاح وتحليل الموقف الحالى وتخفيض مكونات الكويز وان اسكندر الاكبر غازى يبقى ليه نحط له تمثال فى وسط اسكندرية وان ....وان...وان ...عايز اقول ان فيه ناس معندهاش المبادىء الاساسية او عندهاش الحد الادنى من المحتوى المعرفى و متعرفش ايه اللى حصل اصلا وعشان كده بيقلبوا قنوات التليفزيون اللى بتحلل على اعتبار انهم بيتكلموا فى لافراغ الا منتهى يبقى نديهم الاساسيات وبعدين نبقى نحلل....ولا ايه؟؟؟

ولازم نوضح ان الكلام ده مش دعوة للعودة للماضى والعيش على اطلالة لانى شخصيا مش بحب اللى بيفضل يقول احنا احفاد الفراعنة و7000 سنة من غيرعمل وتطوير لكن ده دعوة لمعرفة الماضى معرفة حقه كى نستطيع تجنب اخطائة فى بناء المستقبل.