Tuesday, September 22, 2009

ع السريع ( 11)

ع السريع ( 11)
1. اللى حصل فى فينسيا ده اقل حاجة تتقال عليه انه فضيحة وناس مش فاهمة رغم قامتهم الرفيعة وقيمتهم الفنية.. يا ناس اذا بليتم فاستتروا.منكم لله ضيعتم فرحتنا بوجود الفيلم هناك.مش فاهم يعنى ايه الابطال مشفوش نسخة الفيلم رغم ان فيه اخبار مؤكدة انهم شافوه "فيرست كت".يعنى مكنوش مستنين يرجعوا البلد ويتكلموا لا ده كده فى صحافة العالم.يا فرحة ابله " طازة" فينا.واكيد انتم عارفين مين ابله "طازة"؛ايوه صح برافو اللى اخدم الجايزة.
2. مع تقديرى الكامل لفريق عمل مسلسل اسماعيل ياسين ومسلسل ليلى مراد بس مش عارف ليه كنت حاسس انى شايف عبد المنعم ابارهيم فى بعض الحلقات وشادية فى كل الحلقات!!!
3. صراع الهاكرز المصرى – الجزائرى اثبت انه والحمد لله الشباب العربى عنده فهم ووعى ودراية واسعة وحرفية عالية فى الهاكينج على بعضهم البعض وسرقة المواقع العربية والسطو عليها .بهدوء كده الشباب المحترف ده لو اتحد ممكن يعمل ايه؟؟؟ اعتقد انه ممكن يعمل كتير.
4. اعلان كارفور فى عدد الاهرام الجمعة الماضية بعد زيارة الرئيس بيقول اكتر بكتير من السطرين المكتوبين فى وسط الصفحة اللى كانت فاضية خالص غير من " كارفور يهنئكم بعيد الفطر".
5. الهند تستزرع ارز لا يحتاج للطهو.ده عنوان الخبر اللى بيقول ان فى مقاطعة اسام الهندية – شمال شرق - استزرعت ارز طرى ومرن – ملعب يعنى – تحط عليه الزيت وتاكله.ياريت نبعت لهم خبرائنا بدل ما الفشل الزراعى اللى بقينا فيه بعد ما كنا اسياد الاراضى الزراعية.
6. الصين وما ادراك ما الصين!!!بعد السجاجيد والسبح والعبايات والقفاطين والفول المعلب والفلافل البودرة والنودلز وفوانيس رمضان والحجارة الصوبع ام جنيه والذهب الصينى جاء الدور لتصدير غشاء بكارة جيلاتينى صينى من اختراع اليابان وب 15 دولار بس يا بلاش!!! الحقيقة انا مش بتكلم عن موضوع الشرف والبكارة – رغم انه اساسى - انا بس حتكلم من منطق تجارى بحت لان ده معيار الحوار مع بلد زى الصين. التصدير يعنى ارسال كميات تقدر بالافات او بالملايين بمعنى ان فيه طلب فى مصر اتقدم عشان مصدر او مصنع صينى يبعت لنا المنتج ده بعينه فى الوقت ده - واللى الخبر قال انه بعد رمضان مراعاة لشعور المواطنين – يبقى احنا ندور على مين اللى بعت الطلب ونشوف هوه ازاى قدر ان مصر محتاجه المنتج ده وهل معنى ذلك ان فى مصر مشكلة فى الموضوع ده يعنى ولا ايه مش فاهم؟؟؟ واحد صاحبى علق على الموضوع ده وقال: الصين عايزة تحول مصر من كبريت لولاعة.

No comments:

Post a Comment