تركيا...ترقص

تركيا...ترقص

فى تركيا الرقص انواع واشكال مختلفة أول مشاهداتى ومشاركاتى للرقص فى تركيا كان فى حفل الاستقبال الرسمى والذى اقامته الجامعة المستضيفة وكان الرقص تراثياً عبارة عن مجموعة من الفتيان والفتيات يرقصون على انغام تركية قديمة ظننتها قبرصية او يونانية فى البداية لوجود طعم البحر المتوسط بها ونغاماتها بها صبغة اليود الممزوج بهواء البحر المنعش.

الرقصة كانت عبارة عن خطوات حاولنا التقطاتها خلال الساعة التى رقصوا فيها قبل ان نندفع الى ساحة الرقص كى نشاركهم فهى فرصة لتعلم الاتجاهات التركية فى الرقص الا ان الحلبة تحولت – بقدرة قادر – لحلبة رقص مصرى ولبنانى وتركى ولعل اهم من الرقصة الرسمية هذه ما قامت به فتيات وفتيان الفرقة بتعليمنا اياه بعد الحفلة خلف المسرح خطوات خفيفة وذكية ولذيذة وبرضة كانت الاشارة هى اللغة المعتمدة حيث انهم لا يتحدثون سوى التركية.

ثانى احتكاك كان فى الشارع بمنطقة "كوم كابيه"وهو عبارة عن شارع له فرعين منحدر من امام "الجراند بازار" وينتهى على البحر مباشرة وكله مطاعم سمك ومشويات واحنا بناكل هناك لقينا واحدة رقاصة اه والله رقاصة ولابسة بدلة رقص زرقاء مفتحة مفتحة مفتحة وبترقص ما بين الترابيزات فى كل المطاعم والحق يقال ده مكنش رقص ده كانت مجرد بتهز وسطها وباقى جسمها بس لكن كمصرى عارف يعنى ايه رقص اقدر اقول ان مفيش فن محسناش انها عندها رسالة بتوصلها من خلال الرقصة. لكن الفكرة نفسها لها مدلول تانى لان الهانم الرقاصة كان معاها بودى جارد وغيرت بدلتها 3 مرات ومعاها فرقة بتعزف وراها يعنى فيه نظام وسيستم – حنتكلم عن الشارع اكتر فى مقام اخر –.

أما ثالث الرقصات فهو ما اشبع نفسى وروحى الى ابعد حدود ...موسيقى صوفية ورقص المولولية او الدراويش.الحفلة كانت بالقرب من منطقة سلطان احمد والسوق الكبير فى مبنى كان فى الاصل جامعة والان هو متحف للصحافة التركية يضم مجموعة من اللوحات الاثرية ومكاكينات الطباعة القديمة جدا وبعض الوثائق الصحفية.

قبل ان اتحدث عن الدراويش او دورانهم لابد ان اتناول الحفل والذى اقيم بمناسبة مرور ثمانمائة عام على ميلاد "مولاى جلال الدین الرومي" ولمن لا يعرفه وبدون استرسال فهو أديب وفقيه ومنظِّر وقانوني صوفي. عرف بالرومي لأنه قضى معظم حياته في منطقة تسمى "الروم" في تركيا ؛ وكان مسلما مؤمناً بتعاليم الإسلام السمحة مما مكنه من اجتذاب اامستمعين لتفكيره المرن المتسامح. له من المؤلفات ما بين الشعروالرباعيات ديوان الغزل، مجلدات المثنوي الستة، المحاضر أو الخطب، الرسائل والموعظ الستة الشبه مفقودة وبعد وفاته، حول ابنه "سلطان ولد" تعاليم الرومي إلى مذهب متكامل والذي عُرف بالطريقة المولوية.

بدأ الحفل بقراءة بعض من آيات الذكر الحكيم من احد القراء ثم بعض الادعية والتواشيح من رئيس الفرقة اما الموسيقى فكان لها اثر ووقع فى نفسى اهلنى لحالة لم اكن اتوقع ان اصل اليها من النشوة والصفاء فالحفل كان روحانيا بشكل هائل ودوران الدروايش من خلال اجزاء العرض السبعة مستوحى من الشعر الصوفي والمجله لحب الله من خلال الموسيقى والحركة والدوران.

الرقص او الدوران برفع اليد اليمنى للسماء بهدف استقبال الخيرات من الله سبحانه وتعالى واليد اليسرى موجهة للارض والدوران من اليمين إلى اليسار حول القلب. ثم يبدأ صوت الدفوف والتى تضرب ثلاثاً ثم يتداخل معها صوت الناى ويستمر الدوران بشكل فنى معين فتتشكل ملابسهم بشكل الفانوس وتصل سرعة الدوران عند ذكر عبارة (يارسول الله مدد/ياحبيب الله مدد( ويختتم الدوران ب (الله الله..الله الله..الله الله يا الله).

بعد الحفلة كان عندى نهم شديد اعرفغ اكتر من الاتراك اصدقائنا عن مدى انتشار النوع ده من الرقص وانتشارة وعرفت ان ليه مراكز فى تركيا وان الحفيد العشرين لجلال الدين الرومى هو من يقوم بتسيير اعمال الطائفة الان والغريب انهم ذكروا ان كمال الدين اتاتورك حينما تولى سدة الحكم بعد الدولة العثمانية لغى المولوية ولكنها عادت بعد ذلك وتستخدم فى الاحتفالات التركية الرسمية كنوع من انواع الفلكلور التركى.

وللحديث بقية ان شاء الله.

تركيا...بتفكر بالتركى

تركيا...بتفكر بالتركى
تشكورات افندم...فلد خرسيس أدب مفيس... لما بدى يتسنى...الطرابيش...الباب العالى...الدولة العثمانية...قهوة تركى وأضيف الى هذه الاشياء الاكل التركى والاخيره ده عرفتها من سفرى لاوروبا يقولك مسلم يبقى روح عند محل الاكل التركى والشاورما التركى والكباب والكفته التركى. ده الحاجات اللى علا طول تيجى فى دماغك لما تسمع تركيا.

ولا اخفيكم سراًً ان الفيزا لتركيا واحدة من اسهل الفيز اللى ممكن تاخدها فى حياتك ؛ فى 3 ايام كانت الفيزا على الباسبور وب250 جنية بس ولمدة 3 شهور كمان.الحقيقة فرحت قوى ب 3 شهور دول يعنى لو اتهفيت فى عقلى وحبيت اروح اشوف "التوب كابيه" او لو حبيت اروح اشرب لى فنجان قهوة مظبوط او كوباية شاى زردة او حتى اكل ساندوتش شاورما او حبيت ازرو اصدقائى الاتراك يبقى باسبورى فى جيبى وعلى الطيارة عدل.
المهم ركبت مصر للطيران لاول مرة فى حياتى وشهادة للتاريخ الطيارة كويسة والضيافة عادية يعنى والمضيفة طلعت من طنطا ولذيذة وكويسة والحمد لله الصحبة فى الطيارة كانوا زى الفل وطول الرحلة التى قاربت الساعتين كنا بنتكلم والحمد لله وصلنا هناك بالسلامة.

ونزلنا والحمد لله مطار اسطنبول الدولى ويالهول ما رأيت هوه طابور بس معرفناش اوله فين واخره فين ولما اشتكينا ردوا علينا نفس الرد اللى سمعته فى السويد "اصل فيه طيارتين وصلوا فى نفس الوقت"زى ما يكون المطار معمول عشان طيارة واحدة.واوعوا تفتكروا انى فهمت الجملة ده بالساهل هما اصلا مش بيتكلموا غير تركى لدرجة انى بعد محاورات ومناورات واندساس وسط الناس بقيت بقدرة قادر قدام الظابط اللى مش بيتكلم غير تركى اه والله ولا انجليزى ولا فرنساوى وفضل موقفنى قدامه 10 دقايق ومصر ان انا مش انا لانى فى الباسبورلابس نظارة ومربى شنبى وفى الحقيقة انا مش لابس نظارة ومربى دوجلاس وقعدت احلف له بامانات المسلمين كلهم ان اللى فى الصورة انا بس عملت ليزك وطبعا ولا هو فاهم اى حاجة وكله بالاشارة وبعدين جاب واحد زميله قعد يقلب فى الباسبور وبعدين ختمه ومشانى؛وانا ولا فاهم هو وقفنى ليه ولا مشانى ليه. وهنا لابد من شكر للحكومة لانى عشان مصرى ومتدرب انى اقف طابور فى اى حته بدون تذمر ولانى مدرب وعلى اعلى مستوى على التعامل مع الطوابير ايا كانت اشكالها او انوعها فقدرت اخلص نفسى علا طول.

وانا خارج من المطارقلت فى عقل بالى انا عرفت ليه فى مصر بيقولوا "عقل تركى" وكده بداية مسك وشكل البلد ده مش حيعمر معايا.

المهم ركبنا الاتوبيس وذهبنا الى الفندق اللى مش بعيد عن المطار يعنى حوالى 10 دقايق وعملنا "التشيك ان" اى استلام الغرف بالعربى ؛ اه نسيت اقولكم ان الفندق كان بوليت رينيسانس وكان 23 دور وان غرفتى كانت فى الدور ال19 اول ما دخلت الغرفة جالى ازبهلال وانحوال فى العين من الفيواى المنظرالرائع المذهل اللى حعيش فيه.الشباك بيطل على البيسن من جانب والبسفور ومن الجانب الاخر يطل على الممشى وجانب من المدينة.أسوأ حاجة ان شبابيك الفندق مش بتتفتح؛الظاهر انهم خايفين حد ينتحر ولا حاجة.عايز انقل لكم الوصف التفصيلى للمنظر: "حينما تنظر من نافذة الغرفة تقابلك رقرقات نهر البسفور وأضواء المراكب السابحة البعيدة كنجوم تشع نوراً على النهر وبالاسفل يقابلك تكسر الامواج الصناعية بحوض السباحة والكراسى المتناثرة حوله تناجيك أيا رومانسى وفى الزاوية ممشى يظلله دفء قلوب العشاقين على جانبيه حتى انك تشعر بالحرارة سرت فى أوصالك".

اكتشفنا بعد كده اننا تقريبا محتاجين 45 دقيقة عشان نوصل وسط البلد يعنى احنا فى منفى عشان نركز فى الكورس اللى حناخده فقررنا نعمل جولة حول الفندق واول حاجة لفتت نظرى فى تركيا او اول اوجة التشابه مع مصر ان الشوارع الرئيسية نظيفة والشوارع الجانبية مش نظيفة اما أول وجه اختلاف فهو اهتمام الاتراك بالحدائق فى كل مكان. ومعظم الناس لا يتحدثون سوى التركية ولا انجليزية ولا عربية.واختتمنا اليوم الاول بصدمة عظيمة وهى ان سندوتش الشورما فى الاماكن الراقية زى اللى فى محيط الفندق ب 5 ليرة يعنى حوالى 18 جنية و75 قرش (الليرة تساوى حوالى 3.75 قرش) !!! ورغم ان من مبادىء السفر الاولية انك متفكرش تحسبها بالمصرى لانك كده مش حتشترى حاجة خالص لكن الرقم خضنا فى الاول بس بعد كده بقى عادى جداً وسلم لى على الجنية المصرى.

ملحوظة:
لما الظابط وقفنى فى المطاررنت فى ودانى اغنية " انا مش عارفنى ..انا مش انا".

ع السريع (7)

ع السريع (7)
1. تعرف ايه هو الواوا؟؟طب عمرك بوست الواوا؟طب تحب تبوس الواوا؟؟ ممكن تبوس الواوا على نايل كوميدى ورمضان كريم. ده نص البرومو اللى بيتعرض على نايل كوميدى مع سرسعة غنائية لمجموعة ترتدى زياً فرعونياً.وبما انى مش عارف ابوس الواوا ومبستش الواوا قبل كده ولا ناوى ابوس الواوا عشان احنا فى رمضان؛ نفسى اعرف ايه هو الواوا؟؟؟ده احنا بعد مركزنا مع هيفا لما غنتها معرفناش وهل لو عرفنا الواوا حنقول لعدونا عليه ولا سنعمل بالمقولة الشهيرة"متقلش لعدوك عليه"؟؟. أولا ده اسمه استظراف واستخفاف بتاريخنا عشان نضحك الناس وبعدين بالذمة ده اعلان يتعرض فى رمضان؟!!!

2. برنامج اسمه"مارينا رايح جاى" هو برنامج لزج جدا من نوعية البرامج المستفزة .المهم السيد المذيع استضاف مجموعة من الشباب والبنات وسألهم نفسكم فى ايه واحد قاله نفسى اوصل لفورمة مارينا "صدر ....وبطن شيكولاته" وواحد قاله عايز مزتين دلوقتى رغم ان جنبه مزة جامدة يعنى وواحد كان زكى شوية وطلب يخت فى عرض البحر ومليان مزز عشان محدش يقاسمه فيهم؛ اما البنات فكانت عايزة موبايل جديد وواحدة كانت عايزة تصاحب واحد روش فى الصيف.وفى سؤال جهنمى اخر للفنانة رائدة اعلانات ميلودى "بوبى" اللى كان محسسنى وهوه بيتكلم معاها انه بيتكلم مع سعاد حسنى على اعتبار ان بوبى فنانة شاملة غنا ورقص وان شاء الله داخله فيلم وحتعبى شريط بس هيا قالت انها مش مستعجلة عشان عايزة تعمل كليب كويس واتحفتنا بخبر ينتظره الملايين ان فيه سلسلة اعلانات جديدة ومطرقعة عملتها لميلودى وانها بتحب افكارهم قوى. وفى سؤال تانى للمذيع العبقرى "أنت شايفة ان مارينا لمت؟" ردت عليه بنت زى القمر لابسة بيكينى بس الحق يقال عليه كاش مايوه وقالت"ياىى مارينا لمت خالص السنة ده تصور فيه محشى على البيتش" – الحمد لله طلعت بتعرف المحشى - واخر سؤال بقى لبنتين فى عربية "انتم بتعملوا ايه تانى غير انكم بتكروزوم طول الليل بالعربية ؟"ممكن حد يقولى معلش بقى صيف ومارينا والشباب بيريح ؛ حضراتكم لا ده الشباب ده عنده جوع للجنس الاخر كلهم عايزين مزز وانا شايف ان ده تفرقة عنصرية ما بين البنات يعنى الوحشين يعملوا ايه يعنى...سامع حد من بعيد بيقولى بلاستيك سيرجرى!!!أيه التفاهة ده ..ايه عدم الاهتمام باى شىء جدى ده...ايه السفاهة فى ان شباب يطلعوا فى برنامج زى ده..!!!!

3. فى نفس الوقت الصين بتطلق قناة تليفزيونية موجهة للمنطقة العربية وناطقة بالعربية وتبث القناة الجديدة برامج اخبارية وثقافية وترفيهية على مدار الساعة بهدف تحسن صورة الصين عند سكان الدول العربية وشمال افريقيا وتصحيح المفاهيم المغلوطة.عايز اقولكم ان لما مصر كانا بتلاعب الجزاير وانا فى السويد طلع بوزى عشان الاقى اى حد عنده الفضائية المصرية ملقتش .الحمد لله كده كفاية عليا قوى تليفزيون لان اكتر من كده انا ممكن يجرى لى حاجة من الريادة الاعلامية اللى احنا فيها.

4. احدث احصائية لوزاة الاتصالات ان عدد المشتركين المصريين فى شبكات المحمول الثلاثة وصل 50 مليون من اصل 80 مليون مصرى واللى اصلا بدأ ب 7 الاف مشترك فى 1998 .لما شفت الاحصائية ده فى نشرة الاخبار سألت نفسى سؤال وما هى نسبة الاطفال وطلبة المدارس المشتركين؟؟ونسبة الناس اللى مقضينها اغانى؟؟؟ ونسبة الستات اللى بتستخدم الموبايل عشان تطلب ديلفرى؟؟؟ ونسبة الرجالة اللى بيستخدموا الموبايل عشان يتقابلوا على القهوة؟؟؟ أدينى فى الهايف وانا احبك يا ايه....لا مش يا ناننس دلوقتى يا محمول.

ع السريع (6)

ع السريع (6)
1. موضوع الصيادين المصريين وموضوع اعدام المصريين فى ليبيا ادى الى اهتزاز صورة وزارة الخارجية ورغم تضارب الانباء فى الحالتين وعدم وضوح الرؤية بالنسبة لدور وزارة الخارجية...ورغم ميلى لوجود دور لجهاز حساس مصرى فى الافراج عن الصيادين ؛ فاعتقد ان الوزارة فى حاجة لاعادة تسويق نفسها للشعب لاعادة اكتساب ثقة الشعب المصرى.
2. لسه لغاية دلوقتى مش مصدق خبر سرقة 11 مليون دولار من فندق تسكنه أميرة...انا مش بشكك فى الخبر بس سؤالى هوه ده مصروفها لكام يوم؟؟؟.
3. حد حابب يتدفن فوق مارلين مونرو؟؟؟والله بجد مش بهزر.موقع اى باى عارض المقبرة للبيع وهى مدفون فيها واحد ومراته عايز تبيع المدفن عشان تسدد ديونها....انا افهم ان الواحد يحب يعيش مع مارلين وهيا عايشه لكن وهيا ميته ومتحللة على الاخر!!! ناس ليها حظ وناس ليها ترتر بجد يعنى.
4. موقع جديد اسمة "ديزجى" ممكن تحط فيه كل شبكاتك الاجتماعية على الانترنت وتعمل اكسيس منه..العلم بيتقد يا ولاد http://www.digsby.com
5. ممكن حد يفهمنى ايه كمية المسلسلات بتاعة رمضان ده كلها؟؟!! مين حيتابع ايه وبعدين يقولك أزمة اقتصادية!!!.
6. علا فكرة مصر والارجنتين بينهم حاجة واحدة مشتركة اليومين دول انهم بيبحثوا البث الفضائى لدورى كرة القدم فى البلدين.بس فى الارجنتين السيدة الرئيسه حلت الموضوع فى اجتماع واحد؛ انا مش بقول ان الرئيس يتدخل لان الحقيقة الموضوع مش مستاهل ده كله بس اللى عايز اقوله ان هناك بيغلبوا مصلحة البلد والاندية بجد مش بالشعارات.
7. طالب أمريكى بالابتدائى حاورالرئيس أوباما وطلب منه تحسين وجبات المدارس وإضافة المانجو للوجبة بس الحقيقة هوه نسى يقوله عويسى ولا اسمعلاوى.انتم متخيلين الطفل ده لما يكبر حيكون توجهاته ايه بعد لما قابل الرئيس وهوا طفل بمعنى انه اكيد حيكون انتمائه اكبر لبلده وعطاؤه اعلى ورغبته فى التطوير أكيده.
8. الشحاتين فى بريطانيا بيكسوا 200 استرلينى فى اليوم ومنهم من يمارس الشحاته بهدف الهواية وقبضوا على واحدة هناك موظفة محترمة بس بتشحت بعد الظهر عشان تقضى وقت فراغها وعايزه تغير المطبخ بتاع بيتهم.
9. اشرح العبارة التالية: قرارالوزيربشأن الاستخدام العادل للانترنت قرار استرشادى. يعنى ايه عادل؟؟
10. مازلنا فى انتظار نتائج التحقيقات فى اغتيال د / مروة الشربينى والتى ستظهر اوائل سبتمبر القادم.

على الهواء مباشرة من اسطنبول – تركيا (1)

على الهواء مباشرة من اسطنبول – تركيا (1)
كان المفروض انى احدث الحالة بتاعتى بتاعى على الفيس بوك وتويتر والام اس ان وانا فى تركيا ولكن لظروف القر والعين الكبيرة التى اتضربتها وانا مسافر – بعيد عنكم – تعبت هناك وكان فيه شغل كتير جدا فمكنش فيه وقت ندخل اون لاين.لكن وبما انى بحب اشاركم كل حاجة جمعتهم مرة واحدة:
1. شكل الرحلة كده باين من اوله...ظابط الجوازات التركى مكشر ووقفنى يسألنى عن اسمى ليه مش مكتوب بالتى ومكتوب بالدى وليه مش لابس النظارة .
2. محبوس فى سجن من ذهب بفندق بوليت رنيسانس بتركيا.
3. مبسوط جدا قابلت شلتى القديمة فى تركيا.
4. مفتقد هيثم خلاف جدا.
5. شاورما فراخ....شاورما لحمة....كباب وكفت...كبه....شيش طاووق....قهوة تركى مظبوطة وشاى تركى...احمدك يارب.
6. ساونا...جاكوزى...بيسين......وحمام تركى.
7. بكرة حتكلم قدام 200 من اصحاب الاعمال بالوطن العربى عن " الشركات الصغيرة والازمة الاقتصادية....اختبارالتحديات والفرص".ادعولى.
8. الحمد لله خلصت الكلمة على خير.
9. اسمىِAhmet Paca Issmet زى ما قالت لى Ozge التى تدرس الهندسة وتعمل بالفندق.
10. الدنيا بتشتى هنا يا جدعان...انا مش مصدق نفسى!!!!
11. توب كابيه...ايا صوفيا...المسجد الازرق...رحلة بالمركب بمضيق البوسفور...برج البنات...البورصة...البازار الكبير... السوق المصرى...برج جالطا...الجانب الاسيوى...رقص الدراويش...
12. طول ما احنا ماشيين بنصلى على النبى هنا عشان طول ما احنا ماشيين بنشوف حاجات حلوة حلوة حلوة.
13. صليت الجمعة بالتركى والشيخ قالى انه يجوز!!!!
14. اخر سندوتش شاورما واخر كوباية شاى...تركيا نعدك بزيارة اخرى العام القادم ان شاء الله.
1. It seems it will be a tough visit as the visa man stopped me in the airport asking me for 3 times why I write Ahmed with (D) & not (T).
2. Locked in a golden cage "Polat Renaissance Hotel".
3. Very happ to meet CSO3 gangs again.
4. Missing Haytham Khalaf.
5. Chicken Shawerma….Meat Shaerma…Kabba…Kebab & kofta….Shick Tawook…Turkish coffee…Turkish Tea…THANKS GOD.
6. Sauna…Jakozy…Turkish Hamam(this is how they call it here).
7. Tomorrow I'm gonna give a speech about "SME in the financial crisis…challenges & opportunities".
8. I'm done with the speech.
9. My name is "Ahmet Paca Issmet" as "Ozge" – a girl working in the hotel & studying engineering told me.
10. It's raining here….I can't imagine that!!!!!
11. TopKapi, SultanAhmet, HagiaSophia, phosphoric trip, Asian part, Princess islands, Grand Bazaar, Egyptian (spice Bazaar),Galta Tower & Whirling Dervishes>>>I still have a lot to see>>>places to go.
12. Prayed "El Gomaa" in Turkish & the Emam said that this is ok.
13. Can't be translated.
14. Last Shawerma Sandwich & last cup of tea. Turkey I promise a second visit.

تأبين ميدالية فضة

تأبين ميدالية فضة
هى ليست فقط ميدالية فضية بها مفاتيحى الخاصة احملها معى دائما فى مشاويرى واسفارى وترحالى....
بل هى ميدالية فضية تحملنى معها....بها اسرارى فهى الوحيدة التى تصحبنى فى اماكنى السرية...هى الوحيدة التى تعلم مكنونات نفسى....هى من الاشياء التى لطالما ذكرتنى بان لى فعلا اصدقاء حقيقيون يحبوننى بكل اخطائى وسقطاتى وهفواتى.

تاريخها يعود لعام 2000 وبالتحديد فبراير 2000 حينما كنت بالسنة الثانية بالكلية حيث اجمع ثلاثة من اصدقائى على شراء ميدالية فضية واقترح نادر"المسيحى" – الكلمة هنا ليست للتمييز لكن للتبيان - ان تكون آيه الكرسى. ومنذ هذه اللحظة وهى معى؛ دائماً ما ابرزها لمن يحدثنى عن الفتنة النائمة والنار اللى هى تحت الرماد. قد تظنونى ساذجاً ولكن فعلاً هى ردى الاول قبل ان انتقل للتحليل والمنطق وتفنيد الاحداث فى هذا السياق.

ونادر- لمن لا يعرفه - هو من اصدقائى المقربين وبالصدفة المحضة اكتشفنا ان والدينا كان زملاء دفعة واحدة اواخرالستينات. نتقاسم مجموعة من الصفات والاشياء وطريقة التفكير غير ان نقطة خلافنا الوحيدة اننى اكره المحاسبة وهو يعشقها وهو عكسى يكره الادارة وانا اعشقها.

نعود لميداليتى الفضية وذكرياتى الكثيرة معها على مدار تسع سنوات وستة اشهر أى مائة واربعة عشر شهراً أو ما يعادل ثلاثمائة واربعة وسبعة وسبعون يوماً تقريباً ؛طافت معى هذه الميدالية تقريبا عشرون محافظة من محافظات الجمهورية وحوالى تسع دول عربية واوروبية كما ارتابت حينما وجهت الى اول دعوة لشخصى للسفر للخارج. شهدت لحظة استقبالى لخبر نجاحى وتخرجى فى كلية التجارة وشهدت استقبالى خبر وفاة جدتى – رحمها الله – وكانت شاهداً على استقالتى من سيتى بنك ومن بعده كريدى اجريكول.وقفت على رأسى حين اخترت شيئاً ما جانبنى فيه الصواب ولم تلمنى بل ساندتنى فى محنتى. ضحكت معى كثيراً عندما اتلقى مكالمة على هاتفى المحمول من اشخاص لم يستقبلونى فى بداياتى الاولى بل وبعض من لفظونى والآن يطلبونى.عاصرت معى ثلاثة اعياد ميلادى ل "أجندة الاسكندرية" وكانت الوحيدة التى تشعر بقلقى الداخلى وابتسامتى الظاهرية مفكراً فى القادم.

ذات مرة شاهدتها احدى صديقاتى وقالت لى لم هى رمادية اللون وليست سيلفر؛الا تنظفها؟؟؟ وكنت اجهل تماما كيفية تنظيف الفضة...وقالت لى انها سهلة جدا كربوناته ونصف ليمونة وبالفضل عادت الميدالية تلمع وعادت لها فضيتها فى لونها ؛ وقتها شعرت كم قصرت فى حقها.

ميداليتى....
الا سامحتنى على سهوى....نعم فقدتك ولكنى ابداً لن افقد ذكرياتنا معاً.

ع السريع(5)

ع السريع(5)
1. عبفضيل سعره وصل 7.5 مليون جنية...عبفضيل رايح الزمالك...عبفضيل رايح الاهلى...الاسماعيلى "لابد من بيع عبفضيل عشان نجيب الحضرى"...اختفاء عبفضيل...عبفضيل وقع للاهلى رغم تأكيده رغبته اللعب للزمالك...سؤال ,, مين ..ليه ..فين؟؟!!!
2. الجامعات الخاصة او العزب الخاصة تنزل بمجموع الالتحاق بها وتخسف بيه الارض؛ واعتقد ان ده مش عشان سواد عيون الطلبة ولا عشان التعليم المتميز ولا عشان البلد ده عشان يجيبوا فلوس ويلموا غله يغطوا بيها "سنة الفراغ".يا ايها الناس اتقوا الله فى التعليم فى البلد ده. يعنى انا عارف ان العلم فى الراس مش فى الكراس وان امتحاناتنا لا تقيس الطلبة قياسا فعليا وممكن يبقى فيه طالب حاله مغص ليلة الامتحان فمجبش مجموع لكن مش كل دول يعنى مظلومين وبعدين كمان كام سنة قبل ما اروح لدكتور اسئلة انت خريج جامعة ايه ولا المهندس اقوله انت كنت جايب كام فى الثانوية وكله كوم ولا الاعلام اللى بقى ب 50 % هيا المشرحة ناقصة قتلا ولا حول ولا قوة الا بالله.
3. ساقتنى الاقدار اروح مركز صيانة محترم بسيارة والدى وشاهدت الموقف التالى: واحد ماسك الميكانيكى ومبهدله عشان حاجة فى الماتور رغم انى كنت واقف وشايف ان الميكانيكى كان عامل كونسولتوا مع اتنين تانين على العربية ده...وفى وسط الكلام الميكانيكى قال للراجل يا سيد انت بتكلم مهندس وفجأة لقيت الراجل بيقول له طب الله ينور...طب ليه م الاول ولا هوه عشان لابس عفريته يبقى نكرة يعنى وياما ميكانيكية بيفهموا احسن من المهندسين.فى المانيا مفيش مهندس بياخد شهادته غير لما يشتغل عامل سنتين عشان لما يبقى مهندس يحس بالعمال اللى هوا كان واحد منهم فى يوم من الايام.ارحموا من فى الارض يرحمكم من فى السماء.
4. لعل الحشد الغفيرالذى حضر – والذى لم يتمكن من الدخول ايضاً- ندوة العالم المصرى أحمد زويل بمكتبة الاسكندرية لهو ابلغ دليل على ان الشباب المصرى يبحث فعلا عن قدوة له وعن شخصية محترمة ينصت اليها.
5. نجحت دار الاوبرا المصرية من خلال حفلاتها المجانية وتواجدها بقلعة قايتباى والشلالات مجاناً بالاسكندرية فى كسر عدم اقبال المواطن العادى على دخول الاوبرا التى يشترط لها زيا رسميا عبارة عن بدلة كاملة مع ربطة العنق وهو تفكير ذكى لحس الجمهور على الاستماع لفن جيد فى نوعه ويقدم رسالة راقية....تحية لكل العاملين باوبرا الاسكندرية على هذا الصيف الناجح.
6. رسالة موجهة لناس عارفة نفسها: يا جماعة فى كتب بتنزل السوق بدون اى هدف او رسالة وبتنجح بسبب الشوشرة والقيل والقال ورفع القضايا واعتراض الناس عليها لعدم مناسبتها للذوق العام. وجهة نظرى ان حرية التعبير مكفولة للجميع لكن لو محدش اتكلم عن نوعية الكتب ده حتموت لوحدها لانها لا تقدم فى ذاتها قيمة ادبية او فنية وانما هيا مجرد حبر على ورق.
7. تحتفل "أجندة الاسكندرية" اليوم بمرور ثلاثة اعوام على صدورها (أغسطس 2006 ) ولا اجد ما اقوله سوى" سبحان الله وبحمده سبحان الله العظيم".